لاہور،خودکش حملوں سے گونج اُٹھا۔2دھماکوں میں بچوں سمیت35افراد جاں بحق۔ایف آئی اے کی عمارت تباہ۔قریبی سکول کے متعدد بچے زخمی:
لاہور(اُردو پوائنٹ اخبار تازہ ترین۔11مارچ۔2008ء)لاہور میں دو انتہائی زور دار دھماکوں سے بچوں سمیت 35کے قریب افراد جاں بحق اور متعدد زخمی ہوگئے ہیں۔ دھماکے خودکش کار بم حملے بتائے جاتے ہیں۔ پہلا حملہ ایف آئی اے کی عمارت پر کیا گیا،یہ دھماکہ انتہائی شدید تھا۔جس کے نتیجے میں آٹھ منزلہ عمارت مکمل طور پر تباہ ہوگئی۔ اس واقعے میں 30سے زائد افراد جاں بحق اور متعدد زخمی ہوگئے ۔ دھماکے سے قریبی اسکول اور دیگر عمارتوں کو بھی نقصان پہنچا ہے ، اور اسکول کے بھی متعدد بچے زخمی ہوئے ہیں۔ جبکہ درجنوں قریبی عمارتوں کے شیشے ٹوٹ گئے ۔ایف آئی اے کی عمارت پر ہونے والا حملہ ملکی تاریخ کا شدید ترین حملہ بتایا گیا ہے ، جس سے عمارت تباہ ہوچکی ہے ، اور متعدد افراد ملبے تلے دبے ہوئے ہیں۔عمارت کے آٹھویں فلور پر قیدی موجود ہیں۔جنھیں نکالنے کی کوشش کی جارہی ہے ۔ دوسرا دھماکہ ماڈل ٹاؤن میں بیرسٹر اعجاز بٹالوی کی رہائش گاہ پر ہوا، جہاں ایک وین ان کے بنگلے سے جاٹکرائی ۔ اس واقعے میں دو بچوں سمیت چھ افرادجاں بحق ہوگئے ۔دھماکے سے اعجاز بٹالوی کی رہائش گاہ کے ساتھ والا ایس پی چیمہ گھر بھی تباہ ہوگیا ہے ۔