جنوبی وزیرستان میں مکان اور مدرسے پر میزائل حملہ12 افراد جاں بحق‘ متعدد زخمی:
اسلام آباد (اردوپوائنٹ اخبا ر تازہ ترین28 فروری2008 )پاکستان کے قبائلی علاقے جنوبی وزیرستان میں کسی نامعلوم مقام سے داغے گئے ایک میزائل حملے میں12 افراد شہید اور متعدد زخمی ہو گئے ہیں ۔ ذرائع کے مطابق میزائل حملہ جنوبی وزیرستان کے علاقے اعظم ورسک میں طالبان کے حمایتی قبائلی رہنما نیک محمد کے آبائی گاوٴں کالوشہ میں ایک مکان پر گرا جو اطلاعات کے مطابق مقامی طالبان کا ایک ٹھکانہ تھا۔ مقامی لوگوں کا کہنا ہے کہ میزائل بدھ اور جمعرات کی درمیانی شب رات دو بجے کے قریب جنوبی وزیرستان کے صدر مقام وانا سے کوئی دس کلومیٹر مغرب کی جانب افغان سرحد کے قریب گرا۔ جس میں 12افراد جاں بحق ہوگئے۔ ہلاک ہونے والوں میں زیادہ تر مدرسے کے افغان طلباء شامل ہیں ۔علاقے کے لوگوں کا کہنا ہے کہ جس مکان پر میزائل گرا اس مکان میں کچھ عرصہ سے غیرملکی رہ رہے تھے جو بظاہر عرب معلوم ہوتے تھے۔ ابھی تک یہ معلوم نہیں ہوسکا کہ جاں بحق ہونے والوں میں کوئی اہم رہنما شامل ہے یا نہیں۔ یہ تصدیق نہیں ہوسکی کہ میزائل کہاں سے آئے تھے۔ مقامی لوگ یہ الزام لگا رہے ہیں کہ میزائل افغانستان سے داغے جاتے ہیں ۔ذرائع کے مطابق میزائل مبینہ طور پر امریکی جاسوسی طیارے سے فائر کیا گیا ہے ۔گزشتہ ماہ وزیرستان کے علاقے میر علی میں میزائل حملے میں 11 افراد جاں بحق ہو گئے تھے -