سوات کے علاقوں شور اور پیوچار میں جیٹ طیاروں کی بمباری سے 15شدت پسند ہلاک ، خوازہ خیلہ میں مکانات پر گولے گرنے سے 8 افراد جاں بحق ،باجوڑ ایجنسی میں بمباری اور سیکیورٹی فورسز کے ساتھ جھڑپ میں 13غیر ملکیوں سمیت 24شدت پسند ہلاک ہو گئے ،زیر زمین پانچ بنکرز تباہ:
پشاور(اُردو پوائنٹ اخبار تازہ ترین۔20نومبر۔2008ء)سوات اور باجوڑ ایجنسی میں سیکورٹی فورسز کی کارروائیوں میں 8شہریوں،13غیرملکیوں سمیت47شدت پسند جاں بحق ہو گئے ہیں۔تفصیلات کے مطابق سوات کی تحصیل مٹہ کے علاقوں شور اور پیوچار میں جیٹ طیاروں کی بمباری سے پندرہ شدت پسند ہلاک ہو گئے ۔ شدت پسندوں کے متعددٹھکانے تباہ کر دیئے گئے ہیں۔ خوازہ خیلہ کے علاقے علم گنج میں مکانات پر گولے گرنے سے آٹھ افراد جاں بحق اور متعدد زخمی ہوگئے ۔ دوسری جانب فورسز نے کانجو میں سرچ آپریشن کے دوران چار شدت پسندوں کو گرفتار کرلیا ۔ مینگورہ کے نواحی علاقے قنبر میں شدت پسندوں نے حجام کی چار دکانوں کو دھماکہ خیز موادسے تباہ کردیا۔ مٹہ کے علاقے ڈاگے میں نامعلوم افراد نے فائرنگ کرکے مقامی سیاسی رہنماء لیاقت علی کو قتل کردیا۔ ادھرباجوڑ ایجنسی میں بمباری اور سیکیورٹی فورسز کے ساتھ جھڑپ میں چوبیس شدت پسند ہلاک ہو گئے ہیں۔ ،ہلاک ہونیوالوں میں تیرہ غیر ملکی بھی شامل ہیں، گزشتہ چوبیس گھنٹوں کے دوران جھڑپوں میں متعدد شدت پسند زخمی بھی ہوئے ، فورسز نے شدت پسندوں کے زیر زمین پانچ بنکرز تباہ کر دیئے ہیں،ایف سی ذرائع کے مطابق ہلاک ہونے والے افغان باشندے ہیں۔ ادھر لوئے سم کے علاقے زور بندر میں سیکیورٹی فورسز کے ساتھ جھڑپ میں تین جنگجو ہلاک ہو ئے ،تحصیل ماموند کے علاقے سپرئی ،ڈبر، عنایت کلے ، اور چہارمنگ کے علاقے کوٹکے ،میں سیکیورٹی فورسز نے شدت پسندوں کے مشتبہ ٹھکانوں پر بمباری کی۔ادھر ماموند کے مختلف علاقوں میں جیٹ طیاروں نے مشتبہ ٹھکانوں کو نشانہ بنایا ہے ۔