فاٹا میں اتحادی افواج کی کارروائیاں ملکی سالمیت پر حملہ ہے ، پڑوسی ملک میں بیٹھے اتحادی پاکستان قبائلی علاقوں میں حملہ کرسکتے ہیں، ایکس سروس مین سوسائیٹی کی پریس کانفرنس:
راولپنڈی(اُردو پوائنٹ اخبار تازہ ترین۔12جولائی۔2008ء)پاک فوج کے سابق افسران اور جوانوں کی تنظیم ایکس سروس مین سوسائیٹی نے فاٹا میں اتحادی افواج کی جانب سے کارروائی کی دھمکیوں پر شدید تشویش کا اظہار کیا ہے ۔ راولپنڈی میں ایکس سروس مین سوسائیٹی کے ہنگامی اجلاس کے بعدبریگیڈیئر ریٹائرڈ عبدالسلام اختر نے پریس کانفرنس میں کہا ہے کہ ایکس سروس مین دہشت گردی کیخلاف پاکستان کے نام نہاد اتحادیوں کیجانب سے پاکستانی سرحدوں کی خلاف ورزی کو ملکی سالمیت پر حملہ تصور کرتے ہیں، پاکستان کی سرحدی حدود کی خلاف ورزیوں کا منہ توڑ جواب دیا جانا چاہئے ، انہوں نے کہا کہ مراعات لینے والوں کا جم غفیر اب بھی صدر پرویز مشرف کے قدموں میں بیٹھا ہے ، انہوں نے کہا کہ ایکس سروس میں سوسائٹی کے سیا سی عزائم نہیں اور وہ موجودہ حکومت سے اب بھی کارکردگی کے لئے پر امید ہیں، آئندہ کے لائحہ عمل کے لیے وکلاء اور سول سوسائٹی کی جانب دیکھ رہے ہیں، انہوں نے کہا کہ پاکستان کو مشکل حالات سے نکالنے کی بھر پور کوشش کر رہے ہیں۔انہوں نے خبردار کیا کہ پاکستان کے نام نہاد اتحادیوں کی جانب سے فاٹا میں حملے کا خطرہ ہے ،پاکستانی سرحد پر سیکورٹی اہلکاروں اور شہریوں کو نشانہ بنایا جارہا ہے ، تاہم پاکستان کے عوام اورایکس سروس مین ملک میں کسی بیرونی مداخلت کو برداشت نہیں کریں گے ۔