جنوبی وزیرستان کے علاقے ایف آرجنڈولہ میں بنکرزبنانے کی اطلاع پر سیکورٹی فورسز نے آپریشن شروع کردیا،شمالی وزیرستان میں امریکی جاسوس طیاروں کی پروازیں۔خیبر ایجنسی کی تحصیل باڑہ میں پانچ گھنٹے کی نرمی کے بعد کرفیو دوبارہ نافذ کردیاگیا۔سوات میں مقامی طالبان نے حکومت سے امن مذاکرات شروع کرنے کا اعلان کردیا:
جنڈولہ(اُردو پوائنٹ اخبار تازہ ترین۔3جولائی۔2008ء)جنوبی وزیرستان کے علاقے ایف آرجنڈولہ کے علاقے فقیر کلے اور اردگردکے علاقوں میں عسکریت پسندوں کی جانب سے بنکرزبنانے کی اطلاع پر سیکورٹی فورسز نے علاقے کا محاصرہ کرکے آپریشن شروع کردیا ہے ۔ادھرشمالی وزیرستان ایجنسی میں امریکی جاسوس طیارے نے پاکستانی حدود کی ایک بار پھر خلاف ورزی کی ہے اورمختلف علاقوں پر پروازیں کیں، جس سے عوام میں خو ف وہراس پھیل گیا۔ نجی ٹی وی کے مطابق سیدگئی،میران شاہ،میر علی،رزمت کے علاوہ شہر کے مختلف علاقوں پر صبح سویرے بغیر پائلٹ کے امریکی جاسوسی طیارے نے اونچی پروازیں کیں۔ادھر خیبر ایجنسی کی تحصیل باڑہ میں پانچ گھنٹے کی نرمی کے بعددوبارہ کرفیو نافذ کرکے آپریشن شروع کردیاگیا ہے ۔کرفیو میں نرمی کے دوارن حالات معمول پر رہے ، اور تجارتی سرگرمیاں جاری رہیں۔ نمائندے کے مطابق آپریشن کے چھٹے روز سیکیورٹی فورسز کی جانب سے کوئی کارروائی نہیں کی گئی ۔دوسری جانب قبائلی جرگے نے پولیٹیکل ایجنٹ خیبر ایجنسی کیپٹن ریٹائرڈ طارق حیات خان سے ملاقات کی ۔ جرگے کا کہنا تھا کہ خیبر ایجنسی میں طاقت کے استعمال کے بجائے مسائل بات چیت سے حل کئے جائیں ۔ اس موقع پر پولیٹکل ایجنٹ نے مذاکرات کیلئے حکومت کی جانب سے شرائط پیش کئے ۔ جبکہ تحریک طالبان سوات نے سرحد حکومت سے مذاکرات بحال کرنے کا اعلان کر دیا ہے ۔ تحریک طالبان سوات کے ترجمان حاجی مسلم خان نے نجی ٹی وی کو بتایا ہے کہ ان کے مرکزی امیر بیت اللہ محسود کی ہدایت پر صوبائی حکومت سے مذاکرات بحال کر دیئے گئے ہیں۔ اس سلسلے میں حکومتی ارکان کو بھی اطلاع دے دی گئی ہے ۔ انہوں نے مزید کہا کہ صوبائی حکومت جلد از جلد عملی مذاکرات شروع کرے اور طالبان کے تحفظات دور کرنے کے لیے اقدامات کرے ۔ انہوں نے بتایا کے چند روز میں مذاکرات کا اگلا دور شروع ہوگا۔