پاکستان کی طرف چیک پوسٹ پر اتحادی فضائی حملہ کی شدید مذمت:
اسلام آباد (اُردو پوائنٹ اخبار تازہ ترین۔11جون۔2008ء)پاکستان نے مہمند ایجنسی کے علاقہ گورا پرائی میں ایف سی کی چیک پوسٹ پر اتحادی فضائی حملہ کی شدید مذمت کی ہے ۔ اس حملے میں ایک آفیسر سمیت 11 سیکورٹی اہلکار شہید جبکہ متعدد زخمی ہو گئے تھے ۔ بدھ کو دفتر خارجہ کے ترجمان محمد صادق نے اپنے مذمتی بیان میں کہا کہ یہ حملہ بلا اشتعال پاکستان اور افغانستان کے درمیان بین الاقوامی سرحد کی سنگین خلاف ورزی ہے ۔ ترجمان نے کہا کہ پاکستان کی سرحدی چوکی پر اتحادی فوج کا حملہ اور طاقت کا بے حس استعمال مکمل طور پر ناقابل قبول ہے ۔ اس حملہ کے ذریعے دہشت گردی کے خلاف مہم میں پاکستان کی بڑی قربانیوں کی دانستہ طریقہ سے نفی کی گئی ہے ۔ ترجمان نے کہا کہ حملہ کا مقصد اتحادی افواج کے ساتھ ہمارے تعاون کی بنیاد کو کمزور کرنا ہے اور اس طرح کے سخت اقدامات کے سنگین نتائج کا دوبارہ جائزہ لینے کا متقاضی ہے ۔ ترجمان نے کہا کہ افغانستان میں تعینات اتحادی افواج کو پاکستان کی سرحدوں کی خلاف ورزی اور سرحدی چوکیوں کو نشانہ بنانے سے گریز کرنا چاہیے ۔ ترجمان نے کہا کہ پاکستان اتحادی افواج سے اس واقعہ کی مکمل تحقیقات اور اس کے نتائج سے پاکستان کو آگاہ کرنے کا مطالبہ کرتا ہے ۔ ترجمان نے مزید کہا کہ ہماری افواج کو اپنے شہریوں فوجیوں اور علاقہ کے تحفظ کیلئے تمام ضروری کارروائیوں کا حق حاصل ہے ۔ ترجمان نے کہا کہ سفارتی ذرائع سے اس واقعہ پر مکمل احتجاج ریکارڈ کرایا گیا ہے ۔