افغانستان کیلئے پاکستانی سفیر طارق عزیز الدین3ماہ بعد رہا۔ترجمان دفتر خارجہ نے تصدیق کر دی۔معاہدے کے تحت رزمک کے علاقے سے بازیابی عمل میں آئی:
اسلام آباد(اُردو پوائنٹ اخبار تازہ ترین۔17مئی۔2008ء)افغانستان میں پاکستان کے سفیر طارق عزیز الدین کو بازیاب کرالیا گیاہے ۔ انہیں گذشتہ شب خیبر ایجنسی سے بازیاب کرایا گیا تھا اور اس وقت وہ حکام کی تحویل میں ہیں اور آج کسی وقت اپنی رہائش گاہ پہنچ جائیں گے ۔ترجمان دفتر خارجہ محمد صادق نے افغانستان میں تعینات پاکستان کے سفیر طارق عزیز الدین کی بازیابی کی تصدیق کردی ہے ۔ ذرائع کے مطابق انہیں گذشتہ شب رزمک کے علاقے سے بازیاب کرایا گیا تھا اور اس وقت وہ حکام کی تحویل میں ہیں اور آج کسی وقت اپنی رہائش گاہ پہنچ جائیں گے ۔ پاکستانی سفیرکے بھائی طاہر عزیز الدین کاکہنا ہے کہ طارق عزیز الدین پاکستانی سرحدی حدود میں موجود تھے اور امید ہے کہ وہ آج کسی وقت گھر واپس پہنچ جائیں گے ۔ ذرائع کے مطابق پاکستانی سفیر کی رہائی طالبان سے کئے جانے والے معاہدے کے تحت عمل میں آئی ہے ۔ جس کے مطابق پچپن افراد کو رہا کیا گیاہے اور انیس فروری تک مزید افراد کی رہائی بھی متوقع ہے ۔ طارق عزیز الدین کے ڈرائیور اور محافظ کی بازیابی کی تصدیق نہیں ہوسکی ہے ۔ پاکستان سفیر کو گیارہ فروری دوہزار آٹھ کو کابل جاتے ہوئے پاکستان اور افغانستان کے سرحدی علاقے تحصیل جمرود سے اغواء کرلیا گیا تھا۔ العربیہ ٹی وی چینل نے انیس اپریل کو ان کی ایک ویڈیو بھی نشر کی تھی جو آٹھ مارچ کو ریکارڈ کی گئی تھی۔