قبائلی عوام دہشت گردوں اور انتہاپسندوں سے چھٹکارا پانے سمیت مکمل امن چاہتی ہے‘ آصف زرداری،فوج ملک کا قیمتی اثاثہ ہے‘ہر ضرورت کو پورا کیا جائے گا‘پاکستان کو دہشت گردی سے پاک مملکت بنایا جائیگا عسکریت پسندوں اورجنگجوؤں سے کوئی مذاکرات نہیں ہونگے‘ صدر پاکستان کا آرمی چیف سے ملاقات میں اظہار خیال:
اسلام آباد (اُردو پوائنٹ اخبار تازہ ترین۔4اکتوبر۔2008ء)صدر آصف علی زرداری نے واضح کیا ہے کہ قبائلی عوام دہشت گردوں اور انتہاپسندوں سے چھٹکارا پانے سمیت مکمل امن چاہتی ہے‘ پاکستان کو دہشت گردی سے پاک مملکت بنایا جائے گا‘ عسکریت پسندوں اور دہشت گردوں سے کوئی مذاکرات نہیں ہوں گے‘ پاکستانی حدود میں کارروائی کا اختیار صرف پاکستانی فورسز ہی کو ہے جبکہ فوج ملک کا قیمتی اثاثہ ہے جس کی ہر ضرورت کو پورا کیا جائے گا۔ ان خیالات کا اظہار انہوں نے ہفتے کو ایوان صدر میں پاک فوج کے سربراہ جنرل اشفاق پرویز کیانی سے ہونے والی ملاقات کے دوران کیا۔ آدھے گھنٹے سے زائد دیر تک جاری رہنے والی ملاقات میں دہشت گردی کے خلاف جنگ‘ پاک افغان سرحدی صورتحال‘ فوج کے پیشہ ورانہ امور‘ قبائلی علاقوں اور ملک میں امن وامان کی مجموعی صورتحال سمیت دیگر صورتحال پر تبادلہ خیال کیا گیا۔ ایوان صدر کے ذمہ دار ذرائع کے مطابق ملاقات کے دوران آصف علی زرداری نے کہا کہ حکومت مسلح عسکریت پسندوں اور دہشت گردوں سے کسی قسم کے مذاکرات نہیں کریگی اور ملک سے دہشت گردی کے مکمل خاتمے تک حکومتی اقدامات جاری رہیں گے جبکہ ملک سے دہشت گردی کے خاتمے اور قیام امن کو یقینی بنانے کے لئے جو پالیسی تشکیل دی گئی ہے اس پر بھی عملدرآمد کیا جائے گا۔ انہوں نے کہا کہ فوج ملک کا قیمتی اثاثہ ہے جس کی ہر ضرورت کو پورا کیا جائے گا جبکہ فوج نے ہر مشکل وقت میں حکومت اور عوام کا بھرپور ساتھ دیا ہے۔ صدر نے مزید کہا کہ پاکستانی حدود میں غیرملکی فورسز کو کارروائی کی اجازت نہیں دی جائے گی‘ پاکستان ایک خودمختار اور آزاد مملکت ہے اور جو بھی کارروائی کرے گی وہ پاکستانی فورسز ہی کرے گی۔ صدر زرداری کا کہنا تھا کہ دہشت گردی کے خلاف جنگ اور قیام امن کے لئے قبائلی عوام کا پاک فوج کی مدد کرنا خوش آئند اقدام ہے جبکہ قبائلی علاقوں میں قیام پذیر عوام امن پسند ہے جو جنگجوؤں اور عسکریت پسندوں سے تنگ آ چکی ہے اور قیام امن کے لئے وہ حکومت کے ساتھ ساتھ ہے۔ اس موقع پر چیف آف دی آرمی سٹاف جنرل اشفاق پرویز کیانی نے کہا کہ فوج ہر مشکل سے نمٹنے کے لئے مکمل طور پر تیار ہے اور وہ اپنی سرحدوں کا دفاع کرنا بخوبی جانتی ہے۔ ذرائع نے مزید بتایا کہ ملاقات میں امریکی فورسز کی جانب سے گزشتہ روز وزیرستان میں ہونے والے میزائل حملے میں قیمتی انسانی جانوں کے ضیاع کا معاملہ بھی زیرغور لایا گیا۔