کرم ایجنسی میں ایمبولینس پر نامعلوم افراد کی اندھا دھند فائرنگ ، ایک خاتون سمیت چھ افراد جاں بحق۔کوہاٹ میں دو قبائل میں مسلح تصادم جاری، مزید اٹھارہ افراد ہلاک ، علاقے میں قیام امن کے لئے چودہ رکنی جرگہ تشکیل دے دیا گیا:
کوہاٹ/ٹل(اُردو پوائنٹ اخبار تازہ ترین۔27مارچ۔2008ء)کرم ایجنسی میں ایک ایمبولینس پر نامعلوم افراد کے حملے میں چھ افراد جاں بحق اور ایک زخمی ہوگیا۔ یہ واقعہ ٹل شہر کے قریب پیش آیا،،جہاں مسلح افراد نے ایک ایمبولینس پر اندھا دھند فائرنگ کردی ۔ جاں بحق ہونے والوں میں ایک خاتون بھی شامل ہیں۔ واقعے کے بعد مقامی سیکورٹی حکام نے جائے وقوعہ پر پہنچ کر تفتیش شروع کردی، جبکہ زخمی کو قریبی اسپتال پہنچایا گیا۔ادھرکوہاٹ میں دو قبائل میں جاری مسلح تصادم کے نتیجے میں مزیدا ٹھارہ افراد ہلاک اور متعدد زخمی ہو گئے ہیں۔ انتظامیہ نے علاقے میں قیام امن کے لئے چودہ رکنی جرگہ تشکیل دے دیا ہے ۔ نمائندہ کے مطابق کوہاٹ کے سرحدی شہر کچئی میں مشتئی اور کچئی قبائل کے درمیان گزشتہ چار روز سے لڑائی جاری ہے ۔ جس میں اب تک چالیس کے قریب افراد ہلاک ہو چکے ہیں۔ اس دوران راکٹ لانچروں سمیت ہلکے اور بھاری ہتھیاروں کا استعمال کیا جا رہا ہے ۔ مسلح قبائل نے پہاڑوں پر مورچے بنالئے ہیں۔ جہاں سے وہ ایک دوسرے پر حملے کر رہے ہیں۔ انتظامیہ کی جانب سے تشکیل د یئے جانے والے جرگہ کے ارکان علاقے میں فائر بندی کے لئے فریقین کے قبائلی مشیروں سے آج مذاکرات کر رہے ہیں۔ پانچ روز پہلے علاقے میں بد امنی کے حوالے سے ہونے والے جرگے کے دوران قبائل کے درمیان مسلح تصادم کے نتیجے میں جرگہ کے ارکان سمیت بیس سے زائد افراد ہلاک ہو گئے تھے ۔ جس کے بعد سے دونوں قبائل میں لڑائی جا ری ہے ۔ دوسری جانب ہنگو شہر میں گزشتہ روز بم دھماکے کے بعد نافذ کیا جانے والا کرفیو بدستور برقرار ہے ۔