درہ آدم خیل میں امن وامان کے قیام کی کوششوں کے سلسلے میں مقامی عمائدین اور مشران کو اعتماد میں لیاجائیگا،گورنرسرحد:
پشاور(اُردو پوائنٹ اخبار تازہ ترین۔22مارچ۔2008ء)صوبہ سرحد کے گورنر اویس احمد غنی نے کہاہے کہ درہ آدم خیل میں امن وامان کے قیام کی کوششوں کے سلسلے میں مقامی عمائدین اور مشران کو اعتماد میں لیاجائیگا۔ ہفتے کے روز کوہاٹ کے ایک روزہ دورے کے موقع پر کوہاٹ اور آس پاس کے علاقوں میں امن وامان کی صورتحال سے متعلق ایک اعلی سطح اجلاس کی صدارت کرتے ہوئے گورنر نے اس بات پر زور دیا کہ قبائلی علاقوں کی صورت حال کے حوالے سے مقامی زعما کی رائے کو اہمیت دی جائے گی۔اجلاس میں کوہاٹ کے ریجنل کوآرڈینیشن آفیسر عمر خان آفریدی ، ڈی سی اوکامران زیب، ایس ایس پی ڈاکٹروقار اور اے پی اے ایف آر کوہاٹ نے شرکت کی۔ جس میں گورنر کو ضلع کوہاٹ اور آس پاس کے قبائلی علاقوں بالخصوص درہ آدم خیل کی تازہ ترین صورتحال پر تفصیلی بریفنگ دی گئی۔ اس کے علاوہ ریجنل کوآرڈینیشن آفیسر نے گورنر کو ہنگو ، اورکزئی ایجنسی اور کرم ایجنسی کی صورتحال کے بارے میں بھی تفصیل سے آگاہ کیا۔ گورنرنے اس بات پر زوردیا کہ امن وامان کی صورتحال کے حوالے سے مقامی عمائدین کو ہرمرحلے پر اعتماد میں لیا جائے۔ انہوں نے اس سلسلے میں ایف آر کوہاٹ کی پولیٹیکل انتظامیہ کو ہدایت کی کہ مقامی عمائدین اور مشران کے ساتھ مشاورت کے ذریعے امن وامان کو بہتر بنانے کیلئے ایک موثر لائحہ عمل تیارکیاجائے۔ گورنرنے کہاکہ قبائیلی عمائدین کی رائے اور ان کے مشورے کو اہمیت دی جائیگی تاکہ علاقے میں موجود امن وامان کے مسائل سے خوش اسلوبی کے ساتھ نمٹا جائے اور اس کا کوئی قابل عمل حل تلاش کیاجائے۔