درہ آدم خیل میں عسکریت پسندوں کےٹھکانوں سے بھاری تعداد میں اسلحہ اور گولہ بارود برآمد ، نقل مکانی کرکے جانے والے قافلوں کی صورت میں گھروں کو واپس آرہے ہیں (اپ ڈیٹ 2):
درہ ( اردوپوائنٹ اخبا ر تازہ ترین31 جنوری2008 ) درہ آدم خیل میں عسکریت پسندوں کےٹھکانوں سے بھاری تعداد میں اسلحہ اور گولہ بارود برآمد کرلیا گیا ہے جبکہ سیکیورٹی فورسز نے چند روز قبل چھینے گئے سرکاری مارٹر گولے بھی برآمد کئےہیں ۔ درہ آدم خیل سے نمائندہ ون ورلڈ کے مطابق سیکیورٹی فورسز نے سرکاری اسلحہ بوستی خیل، مزید خیل گزلز کالج، چوڑیا اور ہرانا اخور گارے سے برآمد کیا جبکہ کارروائی میں عسکریت پسندوں کا بھاری اسلحہ بھی برآمد ہوا جس میں راکٹ لانچر اور چھوٹے ہتھیار بھی شامل ہیں ۔فورسز کو کوہاٹ سے چھینی گئی پولیٹیکل انتظامیہ کی تین گاڑیاں بھی ملی ہیں علاقے میں سیکیورٹی فورسز کا گشت جاری ہے جبکہ درہ آدم خیل میں فرنٹیئر کور نے علاقے پر مکمل کنٹرول حاصل کرلیا ہے۔دوسری جانب علاقے سے نقل مکانی کرنے والے خاندان فرنٹئیر کور کی نگرانی میں قافلوں کی شکل میں واپس لوٹ رہے ہیں۔ اب تک ڈیڑھ سو گاڑیوں پر مشتمل شہریوں کے قافلے درہ واپس پہنچ چکے ہیں۔ دوسری جانب آئی ایس پی آر کے مطابق درہ سے اغوا ہونے والے تیرہ سیکیورٹی اہلکاروں کی لاشیں پہاڑی علاقے پایا سے مل گئی ہیں۔کوہاٹ سے نمائندہ کے مطابق کوہاٹ ٹنل کے نزدیک پہاڑی پر تعینات تیرہ سیکیورٹی اہلکاروں کو تین روز قبل اغوا کیا گیا تھا مختلف علاقوں میں بجلی بھی بحال کردی گئی ہے، ادھر انتظامیہ کوہاٹ ٹنل کی صفائی اور مرمت کا کام جاری جو آئندہ دو روز میں آمدورفت کے لئےکھول دی جائے گی ۔