Eid Qurban Par Safai Aur Gosht Ki Hifazat - Article No. 1516

نسرین شاہین :
عیدالاضحی کے موقع پر سب سے زیادہ کام خواتین کا ہوتا ہے، جنھیں باورچی خانے کی صفائی سے لے کر پکوانوں کی تیاری اور دیگر لوازمات کاخیال رکھنا پڑتا ہے، کیوں کہ عیدالاضحی اپنے ساتھ گوشت کے پکوانوں کی بہاروں کے ساتھ ساتھ صفائی ستھرائی کے مسائل بھی لے کرآتی ہے۔
گھر میں قربانی کے جانور کی دیکھ بھال سے لے کرقربانی تک ، تمام مراحل میں صفائی کا اہتمام بے حد ضروری ہے۔ عیدالاضحی کے موقع پر گوشت کو محفوظ کرنے کا واحد ذریعہ ریفریجریٹر ہوتا ہے، اس لیے ضروری ہے کہ بقرعید سے پہلے اس کی صفائی کرلی جائے۔ فریزرمیں رکھی ہوئی غیر ضروری اشیا نکال دیں اور برف پگھلا کر صاف کرلیں۔ فریزر میں پلاسٹک شیٹ بچھالیں، تاکہ گوشت کی تھیلیاں نیچے سے چکیں۔

(جاری ہے)

گھر میں قربانی کے بعد، صفائی ہونے کے باوجود یوں محسوس ہوتا ہے جیسے باورچی خانے کو صاف ہی نہیں کیاگیا۔

خواتین کے لیے قربانی کے بعدکام کانبار ہوتا ہے اور ان کا زیادہ تروقت صفائی اور طرح طرح کے پکوانوں میں صرف ہوجاتا ہے، اس لیے ان کے پاس زیادہ وقت نہیں ہوتا ۔
ذیل میں صفائی اور گوشت کو محفوظ کرنے کے مفید طریقے دیے جارہے ہیں، جن پر عمل کرکے نہ صرف مکھیوں اور چیونٹیوں سے نجات حاصل کی جاسکتی ہے، بلکہ عید قرباں کو گوشت بھی خراب ہونے سے بچایا جاسکتا ہے۔
ریفریجریٹر میں گوشت رکھنے سے پہلے اس کی صفائی کے لیے امونیا کے چند قطرے تھوڑے سے پانی میں ملائیں اور اس سے ریفریجریٹر صاف کرلیں۔ پھر کسی نرم کپڑے سے ریفریجریٹر کو خشک کرلیں۔
اگر ریفریجریٹر یا فریزر سے کسی قسم کی بو آرہی ہو، یعنی پھلوں یاکچے گوشت کی توایک کوئلے کو پیس کر یفریجریٹر میں رکھ دیں۔ اس طرح بو غائب ہوجائے گی، تھوڑے دنوں بعد پسے ہوئے کوئلے کو بدل دیں۔
اسی طرح اگرتھوڑا سا میٹھا سوڈا، یعنی کھانے کا سوڈا، کسی پیالی میں ڈال کر ریفریجریٹر میں رکھ دیاجائے تو نہ صرف بو غائب ہوجاتی ہے، بلکہ کھانے پینے کی چیزوں میں ایک دوسرے کی ناگوار بوبھی نہیں بستی ہے۔
پانی میں سہاگاملا کر ریفریجریٹر کو اندر سے دھودیا جائے۔ اس مقصد کے لیے ایک کلوپانی میں ایک کھانے کا چمچہ سہاگاکافی ہے۔ اندرسے ریفریجریٹر جتنا صاف ستھرا ہوگا، اتنا ہی اچھا ہے، کیوں کہ ریفریجریٹر میں گوشت رکھاجائے گا اور وہ بھی کافی دنوں کے لیے۔
فریزر میں گوشت پلاسٹک کی تھیلی میں لپیٹ کررکھیں اور اس بات کاخیال رہے کہ کچا گوشت کبھی بھی فریزر کی نچلی سطح پر براہ راست نہ رکھیں، بلکہ گوشت کو تاروں سے بنی ہوئی جالی پر رکھا جائے یا پھر فریزر کی نچلی سطح پر شفاف پلاسٹک کی تھیلی ضرور بچھادیں، اس طرح گوشت فریزر کی نچلی سطح سے نہیں چپکے گا اور آپ جب چاہیں گی، گوشت آسانی سے نکل آئے گا۔
گوشت کوزیادہ عرصے تک محفوظ رکھنے کے لیے اس کے چھوٹے چھوٹے ٹکڑے کرکے دھوپ میں سکھا لیے جائیں اور پھر باریک پساہوا کوئلہ لیں اور اسے کسی پلیٹ میں پھیلا کراس پرایک باریک کپڑا بچھا دیں۔ پھر گوشت کے ٹکڑے اس پر رکھ دیں۔ اس پر ایک اور کپڑے کی تہ لگائیں اور اس پر پسا ہوا کوئلہ ڈال دیں، اس طرح گوشت طویل عرصے تک خراب نہیں ہوگا۔
ایک طریقہ یہ بھی ہے کہ دوچمچے سرکے میں دوچمچے پانی ملا کر ململ کاسوتی کپڑا اس میں بھگو کر اسی کپڑے میں گوشت کو لپیٹ کررکھ دیں، اس طرح گوشت زیادہ عرصے تک محفوظ رہے گا۔
قربانی کے بعد فرش پر کئی دنوں تک خون کے دھبے جم جاتے ہیں اور ان کی صفائی ایک مسئلہ بن جاتی ہے۔ قربانی کے فوری بعد کپڑے دھونے والے سوڈے سے یاکسی بھی بلیچنگ پاؤڈر سے اچھی طرح فرش دھولیں، خون کے دھبے صاف ہوجائیں گے۔ دہی سے بھی خون کے دھبے صاف ہوجاتے ہیں۔
اگرگوشت پر مکھیاں آرہی ہوں توسرکے میں پانی ملاکر اس میں سفید ململ کا کپڑا بھگوکر اور نچوڑ کر گوشت پر پھیلادیں، مکھیاں گوشت پر نہیں آئیں گی۔ اگر کھاناکھاتے ہوئے مکھیاں تنگ کررہی ہوں تو دستر کوان پر پودینے کی پتیاں ڈنڈیوں کے ساتھ کسی گلاس میں رکھ دیں، مکھیاں قریب نہیں آئیں گی۔
خون کی بو اور گوشت کی وجہ سے ہر گھر میں مکھیوں کی بہتات ہوتی ہے۔ آپ یوں کریں کہ چاے کی استعمال شدہ پتی کو پھیلاکر ڈال دیں، مکھیاں بھاگ جائیں گی یاپانی میں نمک ملا کر فرش دھولیں تو مکھیاں فرش پر نہیں بھنبھنائیں گی۔
چیونٹیاں بھی بہت کثرت سے آتی ہیں، ان کوبھگانے کاآسان ترین طریقہ یہ ہے کہ جہاں چیونٹیاں ہوں، اس جگہ کو فینائل سے دھوئیں یاوہاں پر سوکھا آٹا ڈال دیں، چیونٹیاں بھاگ جائیں گی۔