Roye Tussi Vi Oo - Article No. 2399

کبھی تخلص یا عرفیت اتنی مقبول ہوجاتی ہے کہ اصل نام گمنام ہو جاتا ہے، جیسے قصور کی اللہ وسائی ملکہ ترنم نور جہاں کے نام سے پہچانی گئی چراغ دین کو بھی دنیا "استاد دامن" کے نام سے ہی جانتی ہے۔ قلندرانہ مزاج کے جوگی نے زندگی لاہور کی ہیرا منڈی کے ایک چھوٹے سے حجرے میں گزار دی۔ یوں تو بہت زبانیں جانتے تھے مگر شاعری کے لئے پنجابی کا ہی انتخاب کیا۔

ہر دور میں وقت کے حکمرانوں سے ٹکر لی اور کبھی تھانے میں پائے جاتے تو کبھی جیل میں۔ کلائی پر ہمہ وقت ہتھکڑی کا نشان رہتا۔ اسی دور میں استاد دامنؔ کی ایک نظم
"دما دم مست قلندر" بڑی مشہور ہوئی۔


عوامی شاعر نے ہمیشہ استحصالی طبقات کی مذمت کی اور حاکمانِ وقت کی گوشمالی میں کبھی بخل سے کام نہیں لیا۔

(جاری ہے)

ان کی شہرہ آفاق نظم "ٹیکس" پڑھو تو یوں لگتا ہے جیسے آج کے حالات پر ہی لکھی ہے۔


استاد دامن کی مقبولیت کا عروج ساٹھ اور ستر کا عشرہ تھا۔ وہ ایوبی اور ضیائی مارشل لاء کے خلاف بھی بولے اور بھٹو کی جمہوریت میں بھی جلسوں کی اگلی صفوں میں نعرے مارتے پائے گئے۔ آمروں اور جمہوریت کے بزر جمہروں کی منافقت پر انھوں نے وہ شہرہ آفاق نظم لکھ ماری جو بعد میں ضرب المثل کی حیثیت اختیار کر گئ۔


سقوط ڈھاکہ پر بہت آزردہ خاطر تھے اور ہمہ وقت رنجیدہ رہتے تھے۔ مشرقی پاکستان کے بارے میں ان کی لکھی نظم نشتر سی دل میں اترتی ہے اور جگر کو چھلنی کردیتی ہے۔


استاد دامن کا آخری وقت ضیائی مارشل لاء میں گزرا۔ گو جسم میں جان نا تھی پر جلسوں کو گرمائےرکھتے اور شعر کہنے سے باز نا آتے۔ پنجابی زبان کا یہ عظیم شاعر تہتر برس کی عمر میں ہمیں داغ مفارقت دے گیا۔ انہی کا اپنا شعر جو ان کی قبر کے کتبے پر لکھا ہے، ان کی زندگی کی پوری کہانی کا احاطہ کرتا ہے اور ہر پڑھنے والے کو اشکبار کرتا ہے۔