خلیفہ ہارون الرشید کے سوانح حیات میں لکھا ہے کہ اس نے امام مالک سے درخواست کی کہ دار الخلافت بغداد میں اگر اپنی مسند بچھایئے،یہاں بڑی رونق اور زندگی کی گہما گہمی ہے۔ یہاں ہر قسم کی قدردانی ہو گی۔ اس مرد خود دار اور عاشق رسول نے میدنے سے ہلنا گوارا نہ کیا۔ فرمایا کہ میں یہاں بندہٴ آزاد ہوں اور میرا سر آستانہ رسول پر ہے۔ عشق خدا و رسول مجھے کہتا ہے کہ تو بادشاہوں کو اپنا خدمت گزار بھی نہ بنا،چہ جائیکہ میں بادشاہوں کا ملازم ہو جاؤں۔
اگر علم دین کا شوق ہے تو یہیں مدینے میں تشریف لایئے،پیاسا کنویں کے پاس جاتا ہے،کنواں پیاسے کے پاس نہیں جاتا:
تو ہمی خواہی مرا آقا شوی
بندہ آزاد رامولا شوی
بہر تعلیم تو آیم بر درت
خادم ملت نگردد چا کرت
بہرہ خواہی اگر از علم دیں
درمیان حلقہ درسم نشیں
#
بے نیازی رنگ حق پوشیدن استت
رنگ غیر ازپیرہن شوئیدن است
اے مسلمان تیری ذلت کا سبب یہی ہے کہ تجھ میں خود داری کا فقدان ہے۔
(جاری ہے)
اغیار کے علوم پڑھتے ہو اور مقلدانہ فطرت کی جہ سے ہر خیال کو بے چون و چرا قبول کر لیتے ہو۔ اغیار کے شعار سے ارجمند ہونا چاہتے ہو۔ تمہاری عقل افکار غیر سے پابزنجیر ہے تمہاری زبان پر جو باتیں ہیں وہ تمہارے اپنے دل و دماغ کی پیداوار نہیں،تمہاری آرزوئیں بھی دوسروں سے مستعار لی ہوئی ہیں۔
بر زبانت گفتگوہا مستعار
در دل تو آرزو با مستعار
اے مسلمان تو اپنے نبی کا فرمان بھول گیا ہے جو شخص دوسری اقوام سے مشابہت پیدا کرتا ہے وہ انہیں میں سے ہو جاتا ہے اور ملت اسلامیہ کا فرد نہیں رہتا۔
لست معنی گویدت مولاے ما
واے ما اے واے ما اے واے ما
تو نے اپنی حقیقت سے غافل ہو کر کیمیا کے بدلے مٹی خریدی ہے:
بر دل خود نقش غیر انداختی
خاک بردی کیمیا درباختی
فرد فرد آمد کہ خود را وا شناخت
قوم قوم آمد کہ جز با خود نساخت
لم یلد ولم یولد
خدا کے ہاں صلبی پیدائش کا کوئی سوال نہیں،علامہ فرماتے ہیں کہ مرد موحد خدا کی اس صفت سے بھی ایک سبق حاصل کر سکتا ہے۔
جسمانی لحاظ سے تو ہر انسان کسی کا بیٹا اور کسی کا باپ ہے لیکن یہ جسمانی ولدیت بہت ثانوی چیز ہے۔ حضرت سلمان فارسی سے لوگوں نے ان کا شجرہ نسب پوچھا تو انہوں نے جواب دیا ”سلمان ابن اسلام“۔ مسلمان کی اصل نسبت اسلام سے ہے،اب و ام سے نہیں۔ توحید پر ایمان لانے سے ایمان کی کیفیت شہید کی سی ہو جاتی ہے جس میں ہزاروں پھولوں کا رس اس طرح آمیختہ ہے کہ کوئی قطرہ یہ نہیں کہہ سکتا کہ میری اصل لالہ ہے یا گلاب یا نرگس۔
لم یلد ولم یولد کا پر تو اگر مومن کی زندگی پر پڑے تو اس کے احساس ملی میں نسب کو کوئی مقام نہ ہو:
قوم تو از رنگ و خوں بالا تر است
قیمت یک اسودش صد احمر است
قطرہ آب وضوے قنبرے
در بہا بر تر ز خون قیصرے
گر نسب را جزو ملت کردہ
رخنہ درکار اخوت کردہ
مسلمان کا نہ کوئی وطن ہے اور نہ کوئی رشتہ نسب اس کیلئے کوئی خاص اہمیت رکھتا ہے۔
اس کا وطن بھی اسلام اور اس کا نسب بھی اسلام۔ عشق محمد اس تمام ملت کا شیرازہ بند ہے جو اطراف و اکناف عالم میں پھیلی ہوئی ہے۔ مسلمانوں کے مختلف فرقوں میں عقائد اور فقہ میں بہت سے اختلاف پائے جاتے ہیں اور ہر فرقہ وجہ اختلاف کو اس قدر اساس تصور کر لیتا ہے کہ اس کو کفر و اسلام کا معیار بنا لیتا ہے۔ خدا کی ذات و صفات کے متعلق بھی تصورات میں بے حد تفاوت پایا جاتا ہے۔
لیکن شاید ہی کوئی شخص اسلام دنیا میں ایسا مل سکے جو مسلمانوں کے گھر میں پیدا ہوا ہو اور محبت رسولﷺ سے اس کا دل بالکل خالی ہو۔ راقم الحروف کو ایسے مسلمانوں سے ملنے کا بھی اتفاق ہوا ہے جو جدید الحادی تعلیم کی بدولت دین کے بنیادی عقائد سے بھی ہاتھ دھو بیٹھے تھے لیکن ناموس رسولﷺ پر جان قربان کرنے کو تیار تھے۔ ان میں سے ایک صاحب نے مجھ سے دریافت کیا کہ نفسیاتا اِس بارے میں کیا کہتی ہے کہ بے دین ہونے کے باوجود ذکر رسولﷺ سے میری آنکھیں نم ہو جاتی ہیں۔
عقائد سے معرا ہونے کے باوجود یہ شخص ملت اسلامیہ کے مفاد کیلئے سراپا ایثار تھا۔ مسلمان کی اسی نفسیات کو،جسے الحاد بھی بدل نہ سکا،اقبال نے ان اشعار میں پیش کیا ہے:
دل بہ محبوب حجازی بستہ ایم
زین ہت بایک دگر پیوستہ ایم
عشق او سرمایہٴ جمعیت است
ہمچو خون اندر عروق ملت است
ترک فرنگ آلودہ ہو جائے یا چینی اشتراکیت کی لپیٹ میں آ جائے لیکن جب کبھی نسل و نسب میں مختلف کسی مسلمان سے ملتا ہے تو اس کے سینے میں اخوت کے جذبے کی ایک لہر پیدا ہوتی ہے۔
یہ سب اس رشتے کی بدولت ہے جو عشق محمدی صلی اللہ علیہ وسلم نے پیدا کیا:
باشیر اندرون شد و با جاں بدر شود
(حافظ)
عشق در جان و نسب در پیکر است
رشتہ عشق از نسبت محکم تر است
عشق ورزی از نسب باید گذشت
ہم ز ایران و عرب باید گذشت
ہر کہ پا در بند اقلیم و جد است
بے خبر از لم یلد لم یولد است
ولم یکن لہ کفواً احد
تمام موجودات میں خدا کا کوئی ہمسر نہیں۔
یہ صفت بھی مرد مومن میں پیدا ہو جاتی ہے۔ لالہ سر کوہسار کی طرح وہ کسی گلچیں کے دامن میں نہیں پڑتا۔ وہ جہاں کے اندر ہے لیکن جہاں سے الگ اور بالاتر ہے۔ مومنوں کی ملت اسی طرح بے ہمتا ہو سکتی ہے کہ اس انداز کی کوئی اور ملت نہ ہو:
رشتہ با ’لم یکن‘ باید قوی
تا تو در اقوام بے ہمتا شوی
آنکہ ذاتش واحد است ولاشریک
بندہ اش ہم در نسازد با شریک
مومنوں کے متعلق جو ”انتم الاعلون“ کی بشارت دی گئی ہے،اس کے یہی معنی ہیں کہ وہ نہ صرف دوسری ملتوں بلکہ فطرت کی تمام قوتوں سے بالاتر ہے۔
جس مومن اور جس ملت کے یہ صفات بیان کئے گئے ہیں وہ اس وقت تو پردہٴ عالم پر کہیں نظر نہیں آ رہی۔ مرد مومن کی پرواز تو ایسی فلک رس ہونی چاہئے کہ اس کا طائر روح ستاروں میں دانہ چینی کرے بلکہ اپنی بلند پروازی میں افلاک کو پیچھے چھوڑ جائے۔ لیکن اس وقت مسلمان کا یہ حال ہے جیسے مٹی کے اندر بسنے والا کیڑا ہو جو فضاے ارضی سے بھی نا آشنا ہے۔ اپنے آپ کو پسماندہ اور ذلیل پار کر گردش ایام کا شکوہ کرتا ہے اور یہ نہیں جانتا کہ قرآن کو ترک کرنے کی وجہ سے اس کی یہ گت بنی ہے۔
مرد مومن کی پرواز کا تویہ حال ہے کہ:
طائرش منقار بر اختر زند
آنسوے ایں کہنہ چنبر پر زند
تو بہ پروازے پرے نکشودہٴ
کرمک استی زیر خاک آسودہ
خوار از مہجوری قرآں شدی
شکوہ سنج گردش دوراں شدی
