پاکستان اسٹاک ایکس چینج میں شدید مندی، سرمایہ کاروں کے 1 کھرب روپے سے زائد ڈوب گئے

کراچی (اُردو پوائنٹ اخبارتازہ ترین - این این آئی۔ 14 دسمبر2017ء) پاکستان اسٹاک ایکس چینج میں کاروباری ہفتے کے چوتھے روز جمعرات کو شدید مندی رہی اور کے ایس ایس 100 انڈیکس 596 پوائنٹس کمی سے 38 ہزار 200 کی نفسیاتی حد پر آگیا۔ سرمایہ کاری مالیت میں 99 ارب 75 کروڑ روپے سے زائد کی کمی، کاروباری حجم گزشتہ روز کی نسبت 21.03 فیصد کم جبکہ 77.52 فیصد حصص کی قیمتوں میں کمی ریکارڈ کی گئی۔

حکومتی مالیاتی اداروں، مقامی بروکریج ہائوسز سمیت دیگر انسٹی ٹیوشنز کی جانب سے توانائی، سیمنٹ، آٹو موبائل اور اسٹیل سیکٹر کی نچلی سطح پر آئی ہوئی قیمتوں پر خریداری کے باعث کاروبار کا آغاز 6 پوائنٹس کے اضافے سے ہوا تاہم سیاسی افق پر بے یقینی کی کیفیت اور ڈالر کے مقابلے میں روپے کی بے قدری کے باعث مقامی سرمایہ کار گروپ تذبذب کا شکار نظر آئے اور اپنے حصص فروخت کرنے کو ترجیح دی جس کے نتیجے میں کے ایس ای 100 انڈیکس 596.10 پوائنٹس کی کمی سے 38223.55 پوائنٹس کی نچلی سطح پر آگیا۔

(جاری ہے)

اتار چڑھائو کا سلسلہ سارا دن جاری رہا۔ جمعرات کو مجموعی طور پر 347 کمپنیوں کے حصص کا کاروبار ہوا جن میں سے 59 کمپنیوں کے حصص کے بھائو میں اضافہ، 269 کمپنیوں کے حصص کے بھائو میں کمی جبکہ 19 کمپنیوں کے حصص کے بھائو میں استحکام رہا۔ سرمایہ کاری مالیت میں 99 ارب 75 کروڑ 92 لاکھ 28 ہزار 732 روپے کی نمایاں کمی ریکارڈ کی گئی جس سے سرمایہ کاری کی مجموعی مالیت گھٹ کر 82کھرب 4 ارب 52 کروڑ 15 لاکھ 51 ہزار 574 روپے ہوگئی۔

مجموعی طور پر 9 کروڑ 29 لاکھ 46ہزار 140 شیئرز کا کاروبار ہوا جو بدھ کے مقابلے میں 2 کروڑ 47 لاکھ 63 ہزار 670 شیئرز کم ہے۔ قیمتوں کے اتار چڑھائو کے حساب سے رفحان میظ کے حصص سرفہرست رہے جس کے حصص کی قیمت 299.98 روپے اضافے سے 6799.98 روپے اور کولگیٹ پامولیو کے حصص کی قیمت 60.00 روپے کمی سے 2590.00 روپے ہوگئی۔ نمایاں کمی وائتھ پاک لمیٹڈ کے حصص میں ریکارڈ کی گئی جس کے حصص کی قیمت 54.00 روپے کمی سے 1405.00 روپے اور صنوفی ایونٹس کے حصص کی قیمت 48.00 روپے کمی سے 1241.00 روپے ہوگئی۔

جمعرات کو ٹی آر جی پاک لمیٹڈ کی سرگرمیاں 1 کروڑ 3 لاکھ 7 ہزار شیئرز کے ساتھ سرفہرست رہیں جس کے شیئرز کی قیمت 1.58 روپے کمی سے 30.22 روپے اور کے الیکٹرک لمیٹڈ کی سرگرمیاں 83 لاکھ 49 ہزار شیئرز کے ساتھ دوسرے نمبر پر رہیں جس کے شیئرز کی قیمت 28 پیسے کمی سے 6.10 روپے پر بند ہوئی۔ جمعرات کو کے ایس ای 30 انڈیکس 342.42 پوائنٹس کمی سے 19060.28 پوائنٹس، کے ایم آئی 30 انڈیکس 1273.40 پوائنٹس کمی سے 65460.53 پوائنٹس جبکہ کے ایس ای آل شیئرز انڈیکس 352.36 پوائنٹس کمی سے 28501.92 پوائنٹس پر بند ہوا۔