یونائیٹڈ بزنس گروپ نے محکمہ انوائرمینٹل پروٹیکشن ایجنسی کی جانب سے پلاسٹک بیگز مینو فیکچررز اور ٹریڈرز کو ہراساں کرنے ، پلاسٹک شاپنگ بیگ کی تیاری میں بائیو ڈیگریڈیبل کیمیکل استعمال کرنے کی شرط کو دہشت گردی،

پشاور(اُردو پوائنٹ اخبارتازہ ترین - آن لائن۔ 30 جنوری2018ء) یونائیٹڈ بزنس گروپ کے سینئر لیڈر اور ملک کے ممتاز صنعتکار سینیٹر الیاس احمد بلور نے محکمہ انوائرمینٹل پروٹیکشن ایجنسی کی جانب سے پلاسٹک بیگز مینو فیکچررز اور ٹریڈرز کو ہراساں کرنے اور پلاسٹک شاپنگ بیگ کی تیاری میں بائیو ڈیگریڈیبل کیمیکل استعمال کرنے کی شرط کو دہشت گردی او ر انتہاء پسندی سے متاثرہ صوبہ کی بزنس کمیونٹی کومزید تباہی کی جانب سے دھکیلنے کے مترادف قرار دیا ہے اور کہا ہے کہ صرف ایک کمپنی کو خوش کرنے کے لئے بزنس کمیونٹی کے وسیع تر مفادات کے خلاف قانون سازی کی جا رہی ہے جسے کسی صورت قبول نہیں کیا جائے گا ۔

پلاسٹک بیگ مینوفیکچررز اور ٹریڈرز کو ہراساں کرنے کا سلسلہ بند کیا جائے ۔ ان خیالات کا اظہار انہوں نے پلاسٹک شاپنگ بیگز ایسوسی ایشن کے صدر دیدار گل کی سربراہی میں آئے ہوئے وفد سے بات چیت کرتے ہوئے کیا ۔

(جاری ہے)

اس موقع پر سرحد چیمبر کے صدر زاہداللہ شنواری بھی موجود تھے ۔ وفد نے سینیٹر الیاس احمد بلور کو بتایا کہ فرانس نے 2014 ء میں مضر صحت ہونے کی وجہ سے بائیوڈیگرڈیبل پلاسٹک پر پابندی عائد کی جس کے بعد سپین اور دیگر یورپی ممالک نے بھی اس پر پابندی عائد کردی ۔

انہوں نے کہا کہ بائیو ڈیگریڈیبل پلاسٹک کھانے پینے کی اشیاء کے لئے بھی مضر ہے ۔ وفد نے بتایا کہ ہندوستان ،ْ امریکہ اور برطانیہ میں کمپوسٹیبل پلاسٹک سڑکیں ،ْ دروازے ،ْ کھڑکیاں ،ْ سی ڈیز ،ْ برتن وغیرہ کے ساتھ ساتھ عمدہ کوالٹی کا ڈیزل اور بجلی بنانے میں استعمال ہوتا ہے جبکہ بائیو ڈیگریڈیبل پلاسٹک سے کوئی چیز بھی تیار نہیں ہوسکتی ۔

وفد نے موقف اختیار کیا کہ پنجاب اور دوسرے صوبوں میں کمپوسٹیبل پلاسٹک پر پابندی عائد کرنے کی بجائے اسے باقاعدہ طریقہ سے اکٹھا کرنے کے بعد پلاسٹک پروسیسنگ پلانٹس میں ری سائیکل کرکے مفید اشیاء بنانے میں استعمال کیا جاتا ہے ۔ انہوں نے کہا کہ پنجاب اور دوسرے صوبوں کی تقلید کرتے ہوئے صوبہ خیبر پختونخوا کو بھی کمپوسٹیبل پلاسٹک پر پابندی کی بجائے اس کو موثر طریقہ سے اکھٹا کرکے مفید اشیاء کی تیاری میں استعمال کرنا چاہئے ۔

سینیٹر الیاس احمد بلور نے وفد کے تحفظات اور سفارشات سے مکمل طور پر اتفاق کیا اور صوبائی حکومت سے مطالبہ کیا کہ پلاسٹک شاپنگ بیگ کی تیاری میں بائیوڈیگریڈیبل کیمیکل استعمال کرنے کا فیصلہ فوری طور پر واپس لیا جائے اور محکمہ انوائرمینٹل پروٹیکشن ایجنسی کی جانب سے پلاسٹک بیگز مینو فیکچررز اور ٹریڈرز کو ہراساں کرنے کا سلسلہ بند کیا جائے ۔ انہوں نے کہاکہ ایران ،ْ پنجاب اور قبائلی علاقوں سے سمگلنگ کے ذریعے پلاسٹک بیگز مارکیٹ میں فروخت ہو رہے ہیں ۔ حکومت سمگلنگ کو روکے اور پلاسٹک بیگز مینوفیکچرنگ ایسوسی ایشن کو کاروبار کرنے دے۔