براڈ بینڈ کی سہولت جلد پورے ملک میں دستیاب ہوگی، ڈیجی سکلز پروگرام سے روزگار کے 10 لاکھ نئے مواقع پیدا ہوں گے، میرے نزدیک قومی سلامتی کا مطلب ہر نوجوان کو روزگار کی فراہمی ہے، صنعتوں اور اداروں میں جدید ٹیکنالوجی سے استفادہ کے ذریعے اخراجات میں کمی کے ساتھ ساتھ بہتر نتائج کے حصول کو یقینی بنایا جا سکتا ہے، حکومت اداروں میں جدید ٹیکنالوجی کے استعمال کے فروغ کے لئے کام کر رہی ہے

اسلام آباد ۔ یکم فروری (اُردو پوائنٹ اخبارتازہ ترین - اے پی پی۔ 01 فروری2018ء) وزیراعظم شاہد خاقان عباسی نے 10 لاکھ نوجوانوں کو آن لائن پروگرام کے ذریعے آئی ٹی کی مہارتوں سے روشناس کرانے کے لئے ’’ڈیجی سکلز پروگرام‘‘ کا آغاز کرتے ہوئے یقین دلایا ہے کہ حکومت اس اقدام کے لئے نجی شعبے کو ہر ممکنہ سہولت فراہم کرے گی، براڈ بینڈ کی سہولت جلد پورے ملک میں دستیاب ہوگی، صنعتوں اوراداروں میں جدید ٹیکنالوجی سے استفادہ کے ذریعے اخراجات میں کمی کے ساتھ ساتھ بہتر نتائج کے حصول کو یقینی بنایا جاسکتا ہے، حکومت اداروں میں جدید ٹیکنالوجی کے استعمال کے فروغ کے لئے کام کررہی ہے۔

وہ جمعرات کو یہاں وزیر اعظم آفس میں ورچوئل یونیورسٹی اور اگنائٹ-نیشنل ٹیکنالوجی فنڈ کے باہمی اشتراک سے نوجوانوں کے لئے شروع کئے گئے ڈیجی سکلز پروگرام کی افتتاحی تقریب سے خطاب کررہے تھے۔

(جاری ہے)

پروگرام کے تحت 10 ہزار سے زائد نوجوانوں کو مختلف کورسز میں تربیت فراہم کی جائے گی جبکہ اس سے 10 لاکھ سے زائد روزگار کے نئے مواقع فراہم ہوںگے۔ وزیر اعظم نے کہاکہ موجودہ حکومت جدید ٹیکنالوجی متعارف کرانے اور ملک کو آگے لے جانے کے لئے اس قسم کے منصوبوں میں نجی شعبے کو معاونت فراہم کرنے کے لئے پر عزم ہے۔

جدید ٹیکنالوجی سے استفادہ کرکے ہم بہتر نتائج حاصل کرنے کے ساتھ ساتھ اخراجات میں کمی کے ذریعے کاروبار کوزیادہ منافع بخش بنا سکتے ہیں۔ انہوں نے کہاکہ حکومت جدیدٹیکنالوجی کے لئے کام کررہی ہے اور نوجوانوں کو سہولیات فراہم کرکے ان کی صلاحیتوں سے بہتر استفادہ کیا جاسکتا ہے۔شاہد خاقان عباسی نے کہاکہ حکومت ملک بھر میں براڈ بینڈ کی دستیابی کو یقینی بنائے گی اور ای کامرس میں سہولت دے گی۔

انہوں نے اس ضمن میں مزید کام کرنے کی ضرورت پر زور دیتے ہوئے کہاکہ انفارمیشن ٹیکنالوجی کے میدان میں ترقی کی بدولت دنیا تیزی سے تبدیل ہو رہی ہے۔ اس ضمن میں جدید ٹیکنالوجی کو بروئے کار لانے میں نجی شعبہ پیش پیش ہے۔ انہوں نے کہا کہ حکومت نے کئی شعبوں میں نہایت شاندار کارکردگی دکھائی ہے۔ موٹرویز، بندر گاہوں ، ہوائی اڈوں کی تعمیر کے علاوہ نئے بجلی بھر قائم کئے گئے ہیں تاہم انفارمیشن ٹیکنالوجی کے شعبے میں نمایاں کامیابی کو گزشتہ پانچ برسوں میں ایک اہم پیش قدمی کی حیثیت حاصل ہے۔

انہوں نے کہاکہ ڈیجی سکلز پروگرام سے نوجوانوں کو آن لائن روزگار ملے گا اور وہ غیر روایتی انداز میں آمدنی حاصل کر سکیں گے۔ انہوں نے کہاکہ ہمارا نوجوان طبقہ اور بالخصوص خواتین باصلاحیت ہیں جو ای کامرس اور ڈیجی سکلز کے شعبہ میں مستقبل کی رہنما ثابت ہوںگی۔ انہوں نے کہاکہ دنیا میں ڈیجیٹل کے شعبہ میں تیزی سے تبدیلیاں ہو رہی ہیں اور ہمیں ان تبدیلیوں کے مطابق چلنا ہو گا۔

وزیراعظم نے ڈیجی سکلز پروگرام کے حوالے سے ورچوئل یونیورسٹی اور ہائر ایجوکیشن کمیشن کی کاوشوں کو سراہتے ہوئے کہا کہ پروگرام کا اجراء خوش آئند ہے اور ملک میں جاری دیگر منصوبوں کی طرح اس منصوبے کا بھی ملکی ترقی میں بڑا حصہ ہو گا۔ انہوں نے کہاکہ حکومت نجی کمپنیوں اور اداروں کو جدید ٹیکنالوجی سے استفادہ کے حوالے سے ہرممکنہ معاونت فراہم کرے گی۔

انہوں نے ملک میں انفارمیشن ٹیکنالوجی کے شعبہ کی ترقی کے حوالے سے وزارت انفارمیشن ٹیکنالوجی کی کارکردگی کو سراہا۔ وزیر مملکت انفارمیشن ٹیکنالوجی انوشہ رحمن نے ڈیجی سکلز پروگرام کو حکومت کے انفارمیشن ٹیکنالوجی اقدام کا اہم جزو قرار دیتے ہوئے کہا کہ اس کے پروگرام سے نوجوانوں کے لئے روزگار کے مواقع پیدا ہوں گے اور وہ ماہانہ دو سو سے تین سو ڈالر کما سکیں گے۔

انہوں نے کہاکہ اس پروگرام کے مدد سے ملک بھر کے نوجوان دنیا بھر میں خدمات فراہم کرسکیںگے۔ انوشہ رحمن نے کہاکہ مسلم لیگ (ن) کی حکومت ملک میں روزگار کے مواقع پیدا کرنے کے لئے ٹیکنالوجی کو بروئے کارلانے کا منشور رکھتی ہے اور اب یہ خواب شرمندہ تعبیر ہو رہا ہے۔ انہوں نے کہاکہ پاکستان دنیامیں آئی ٹی لیڈر کی حیثیت سے ابھر رہا ہے۔ حکومت اپنی نوجوان نسل کے تابناک مستقبل کے لئے پر عزم ہے۔ نوجوانوں کو مختلف شعبوں میں ہنر مند بنایا جارہاہے اوران کے لئے آن لائن کورسز کی حوصلہ افزائی کی جائے گی۔ تقریب میں سی ای او ’’اگنائٹ‘‘ یوسف حسین، ورچوئل یونیورسٹی کے ریکٹر نوید ملک، مختلف آئی ٹی کمپنیوں کے نمائندوں نے بھی شرکت کی۔