اقتصادی آتش فشاں کو پھٹنے سے روکنے کیلئے حکومت کوازسر نو پالیسی مرتب کر نا ہو گی‘ خواجہ حبیب الرحمان

ڈالر کی قیمت میں آئے روز اضافہ خطرے کی گھنٹی ہے،کنٹرول کرنے کیلئے سخت ترین اقدامات اٹھائے جائیں ایکسپورٹ پیکیج میں توسیع نہ کی گئی تو حکومت کو آئی ایم ایف کے پاس جانا پڑ سکتا ہے‘ صدر ایران پاک فیڈریشن آف کلچر اینڈ ٹریڈ

اتوار 13 مئی 2018 12:40

لاہور(اُردو پوائنٹ اخبارتازہ ترین - این این آئی۔ 13 مئی2018ء) ایران پاک فیڈریشن آ ف کلچر اینڈ ٹریڈ کے صدر خواجہ حبیب الرحمان نے کہا ہے کہ ڈنگ ٹپائو اور ایڈہاک پالیسیوں ،بیرونی قرضوں کی واپسی میں توازن کے فقدان نے معیشت کا بیڑہ غرق کر دیا ہے جس کے منفی اثرات عام آدمی کی زندگی پر بھی مرتب ہوئے ہیں،پانچ سالہ منصوبوں کے نام پر غیر حقیقی اعداد و شمار، ادائیگیوں میں توازن کا مسئلہ، بدانتظامی، سرکاری اور غیر سرکاری شعبوں میں بے قابو کرپشن کے باعث ملکی وغیر ملکی قرضوں کا حجم روز بروز بڑھ رہا ہے جبکہ تجارتی خسارہ30 ارب ڈالر ہو گیا ہے،اقتصادی آتش فشاں کو پھٹنے سے روکنے کیلئے حکومت کوازسر نو پالیسی مرتب کر نا ہو گی۔

ان خیالات کا اظہار انہوں نے اپنے دفتر میں تاجروں کے وفد سے ملاقات میں گفتگو کرتے ہوئے کیا۔

(جاری ہے)

خواجہ حبیب الرحمان نے نے کہا کہ ڈالر کی قیمت میں آئے روز اضافہ ملکی معیشت کیلئے خطرے کی گھنٹی ہے ، ضرورت اس امر کی ہے کہ حکومت ڈالر کی قیمت کو کنٹرول کرنے کیلئے سخت ترین اقدامات کرے، ڈالر کے مقابلے میں روپے کی قدر میں کمی سے صنعتی پیداوار متاثر ہو رہی ہے کیونکہ روپے کی بے قدری کے باعث درآمدی خام مال کی قیمت بڑھ چکی ہے جس کی وجہ سے ملک کے اندر تیارہونے والے مصنوعات کی پیداواری لاگت میں اضافہ ہو رہا ہے ۔

انہوں نے کہا کہ ایکسپورٹ پیکیج میں توسیع نہ کی گئی تو حکومت کو آئی ایم ایف کے پاس جانا پڑ سکتا ہے اس لیے برآمدات میں اضافے کا رجحان برقرار رکھنے کیلئے ایکسپورٹ پیکیج میں توسیع نا گزیر ہے، ایکسپورٹ بڑھنے سے زرمبادلہ کے ذخائر مستحکم رکھے جاسکتے ہیں اور اس طرح آئی ایم ایف کے پاس بھی نہیں جانا پڑے گا۔