فیصل آباد وومن چیمبر آف کامرس اینڈ انڈسٹری کا قیام کاروباری خواتین کیلئے بہت بڑی نعمت ہے۔ حبیب شیخ

فیصل آباد۔17جولائی(اُردو پوائنٹ اخبارتازہ ترین - اے پی پی۔ 17 جولائی2018ء) فیصل آباد وومن چیمبر آف کامرس اینڈانڈسٹری کا قیام اس خطے کی خواتین کیلئے بہت بڑی نعمت ہے جس کے ذریعے نہ صرف نئی تعلیم یافتہ خواتین اپنے لئے باعزت کاروبار شروع کر سکتی ہیں بلکہ پہلے سے چھوٹے چھوٹے کاروبار کرنے والی خواتین بھی اپنے کاروبار کو توسیع دے سکتی ہیں۔ یہ بات حبیب شیخ نے فیصل آباد وومن چیمبر آف کامرس اینڈانڈسٹری میں خواتین کیلئے ایک تربیتی ورکشاپ سے خطاب کرتے ہوئے کہی۔

ورکشاپ کا عنوان کاروباری ذہنیت اور کلچر کی ترویج تھا۔ حبیب شیخ نے کہا کہ فیصل آباد بنیادی طور پر صنعتی ، تجارتی اور کاروباری مرکز ہے ۔ اس شہر کے مردوں کی طرف سے یہاں کی خواتین میں بھی کامیاب کاروبار کرنے کی صلاحیتیں بدرجہ اتم موجود ہیں۔

(جاری ہے)

مگر وہ مالی گھریلو اور سماجی مسائل کی وجہ سے ان کا عملی اظہار نہیں کر پاتیں۔ انہوں نے کہا کہ مردوں کی طرح عورتوں کیلئے بھی کاروبار کرنے کے دوبنیادی لوازمات ہیں جن میں مصنوعات کی تیاری اور ان کی مارکیٹنگ شامل ہیں۔

انہوں نے کہا کہ مصنوعات کی تیاری کیلئے سرمایے کی ضرورت ہوتی ہے تاہم چھوٹے پیمانے پر کاروبار شروع کرنے کیلئے تھوڑے سرمایے سے ہی یہ مسئلہ حل ہو سکتا ہے جبکہ تیار کر دہ مصنوعات کی مارکیٹنگ کا مسئلہ بھی آن لائن سسٹم نے کافی حد تک حل کر دیا ہے ۔ انہوں نے کہا کہ چھوٹے پیمانے پر گھروں میں رہتے ہوئے خواتین مختلف نوعیت کی منفرد اور انواع و اقسام کی مصنوعات تیار کر کے آن لائن سسٹم کے ذریعے فروخت کر سکتی ہیں۔

لیکن ابھی تک اس طریقہ کار کو بڑے پیمانے پر پذیرائی نہیں مل سکی۔ انہوں نے فیصل آباد میں وومن چیمبر آف کامرس اینڈ انڈسٹری کے قیام کو اس سلسلہ میں ایک اہم پیش رفت قرار دیا اور کہا کہ خواتین اس پلیٹ فارم کو استعمال کر کے اپنی مصنوعات کی موثر تشہیر اور مارکیٹنگ بھی بھی کر سکتی ہیں۔ فیصل آباد وومن چیمبر آف کامرس اینڈانڈسٹری کی صدر محترمہ روبینہ امجد نے بتایا کہ کاروباری خواتین کو ایک پلیٹ فارم پر جمع کرنا ان کیلئے بہت بڑا چیلنج تھا تاہم اس چیمبر کے قیام نے ان کا یہ مسئلہ حل کر دیا ہے۔

انہوں نے کہا کہ وومن چیمبر نے اپنے قیام سے لے کر اب تک خواتین کو قومی معاشی ترقی کا حصہ بنانے کیلئے کئی بنیادی اور کلیدی اقدامات اٹھائے ہیں۔ انہوں نے اس سلسلہ میں جامعہ زرعیہ میں ہونے والے کاروباری خواتین کے پہلے فیسٹیول کا خاص طور پر ذکر کیا جس کے ذریعے لوگوں کو اس شہر کی کاروباری خواتین کی صلاحیتوں کو اعتراف کرنا پڑا ۔انہوں نے کہا کہ وومن چیمبر نے خواتین کیلئے ایک درجن سے زائد تربیتی ورکشاپس اور سیمینار ز کا بھی اہتمام کیا تاکہ ان کے بنیادی مسئلوں کی نشاندہی کر کے ان کے حل کیلئے عملی اقدامات اٹھائے جا سکیں۔

انہوں نے بتایا کہ یہ ورکشاپ بھی اس سلسلہ کی ایک کڑی ہے۔ اس سے قبل ورکشاپ میں شریک ہونے والی خواتین نے اپنا تعارف کرانے کے علاوہ اپنے انفرادی اور اجتماعی مسائل کی بھی نشاندہی کی۔