حکومت پنجاب نے تمام ریونیو افسران کو لینڈ ریونیو،واٹرریٹ،زرعی انکم ٹیکس،سٹمپ ڈیوٹی،رجسٹریشن فیس،کیپٹل ویلیو ٹیکس کی 100فیصد وصولی یقینی بنانے کا ٹاسک سونپ دیا

فیصل آباد (اُردو پوائنٹ اخبارتازہ ترین - اے پی پی۔ 19 نومبر2018ء) حکومت پنجاب نے تمام ریونیو افسران کو لینڈ ریونیو،واٹرریٹ،زرعی انکم ٹیکس،سٹمپ ڈیوٹی،رجسٹریشن فیس،کیپٹل ویلیو ٹیکس کی 100فیصد وصولی یقینی بنانے کا ٹاسک سونپ دیا ہے اور کہا ہے کہ متعلقہ محکمہ جات اور افسران کو سرکاری واجبات کی وصولی کیلئے جو اہداف سونپے گئے ہیں ان کی تکمیل میں کسی غفلت یا کوتاہی کا مظاہرہ نہ کیا جائے بصورت دیگر ناقص کار کردگی اور سرکاری ٹیکسز کی مطلوبہ ٹارگٹ کے مطابق وصولی میں ناکامی پر ذمہ دار افسران کے خلاف سخت محکمانہ کاروائی عمل میں لائی جائے گی اور بعدا زاں کوئی عذر قابل قبول نہ ہو گا۔

ڈویژنل کمشنر آصف اقبال چوہدری نے اس ضمن میں کہا کہ ڈویژن بھر میں سرکاری بقایاجات کی وصولی کی پیشرفت کا ہر پندرہ روزبعد جائزہ لیا جائے گا اور اہداف کے حصول میں تاخیر برداشت نہیں کی جائے گی۔

(جاری ہے)

انہوں نے یہ بات محکمہ مال کے افسران کے اجلاس کی صدارت کرتے ہوئے کہی جس میں ایڈیشنل کمشنرز ہارون الرشید،خادم حسین جیلانی،ایڈیشنل ڈپٹی کمشنر(ریونیو)محبوب احمد،اسسٹنٹ کمشنرریونیو ڈاکٹرانعم،اسسٹنٹ کمشنرز،ریونیو افسران،تحصیلدار،اراضی ریکارڈ سنٹرکے انچارجز کے علاوہ جھنگ،ٹوبہ ٹیک سنگھ اور چنیوٹ کے ڈپٹی کمشنرزویڈیولنک کے ذریعے شریک تھے۔

ڈویژنل کمشنر نے لینڈ ریونیو،واٹرریٹ(آبیانہ)، زرعی انکم ٹیکس،سٹمپ ڈیوٹی،رجسٹریشن فیس،کیپٹل ویلیو ٹیکس اور دیگر مدات میں وصولیوںکی تازہ ترین پیشرفت کاتفصیلی جائزہ لیااورہدایت کی کہ مقررہ ٹارگٹ کو پورا کرنے کیلئے مربوط اور مو ثرلائحہ عمل وضع کیا جائے اور اسسٹنٹ کمشنرزباقاعدگی کے ساتھ کارکردگی رپورٹ سے ڈپٹی کمشنرز اور انہیں آگاہ رکھیں۔

انہوں نے واضح کیا کہ سرکاری بقایا جات کی ریکوری اہم ٹاسک ہے جس کیلئے ریونیو افسران پر بھاری ذمہ داری عائد ہوتی ہے لہٰذ ا وہ اپنے فرائض کی انجام دہی میں کوتاہی نہ کریں۔ڈویژنل کمشنر نے کہا کہ ڈویژن کے چاروں اضلاع میں محکمہ مال کی سروسز کے معیار میں اضافہ کیلئے تقاضوں کے مطابق مئو ثراورتیزرفتار اقدامات کئے جائیںتاکہ سائلان کو بلاتاخیر ریلیف حاصل ہو اور اعلیٰ نظم ونسق کے بارے میں حکومتی مقاصد پورے ہوسکیں۔

انہوں نے اراضی ریکارڈ سنٹرز سے رجوع کرنے والے ہر سائل کو ریلیف فراہم کرنے کی تاکید کی اورڈپٹی کمشنرز و اسسٹنٹ کمشنرز سے کہا کہ وہ اپنے ماتحت افسران اورسٹاف کی محکمانہ سرگرمیوں پر گہری نظر رکھیں اور دفتری نظم وضبط کو بہتر بنانے کے ساتھ ساتھ بد عنوان سٹاف کا کڑا احتساب کیا جائے۔ انہوں نے عدالتی امور میں گہری دلچسپی سے کام کرنے کی ہدایت کرتے ہوئے کہا کہ ریونیو مقدمات شفاف انداز میں تیزی سے نمٹائیں تاکہ سائلان کو پریشان نہ ہونا پڑے۔اجلاس کے دوران ڈپٹی کمشنرز اورایڈیشنل ڈپٹی کمشنر ریونیو نے مختلف مدات میں سرکاری واجبات کی ریکوری کی پیشرفت اور ہدف کے حصول کیلئے جاری اقدامات سے آگاہ کیا۔