لاہور چیمبر کے نائب صدر فہیم الرحمن سہگل کی کراچی چیمبر کے عہدیداروں سے ملاقات

جمعرات 6 دسمبر 2018 20:15

لاہور۔6 دسمبر(اُردو پوائنٹ اخبارتازہ ترین - اے پی پی۔ 06 دسمبر2018ء) لاہور اور کراچی چیمبر آف کامرس اینڈ انڈسٹری کے صنعت و تجارت کی ترقی اور تاجر برادری کے لئے مل کر کام کریں گے، یہ فیصلہ لاہور چیمبر کے نائب صدر فہیم الرحمن سہگل اور کراچی چیمبر آف کامرس کے صدر جنید اسماعیل مکدہ کے مابین ملاقات کے دوران کیاگیا۔ کراچی چیمبر کے نائب صدر آصف شیخ جاوید بھی موقع پر موجود تھے۔

فہیم الرحمن سہگل اور کراچی چیمبر کے عہدیداروں نے یہ فیصلہ بھی کیا کہ دونوں چیمبر مل کر باہمی دلچسپی والے مسائل پر مشترکہ حکمت عملی تشکیل دیں گے،تجارت سے متعلق تمام معلومات ، اشیاء کی مسابقت میں اضافے اور کاروباری لاگت میں کمی جیسی تمام معلومات کا تبادلہ کریںگی اور ملک کی معاشی ترقی کے لئے تجاویز تیار کرنے میں ایک دوسرے سے تعاون کو فروغ دیں گے۔

(جاری ہے)

نائب صدر لاہور چیمبر فہیم الرحمن سہگل نے کہا کہ دونوں چیمبر کے مابین ہم آہنگی تاجر برادری کو درپیش مسائل کے حل کے لئے مددگار ثابت ہو گی۔ انہوں نے کہا کہ نجی شعبہ کی طاقت مل کر کام کرنے میں ہے تاہم دونوں شہروں کی تاجر برادری کو معاشی مسائل اور چیلنجز کا سامنا کرنے میں ایک دوسرے کے ساتھ بھرپور تعاون کرنا چاہیے۔ انہوں نے کہا کہ حکومت بیرون ملک پاکستانیوں کو خصوصی سہولیات دے کیونکہ وہ قیمتی زرمبادلہ بھجواکر ملک کے معاشی استحکام میں اہم کردار ادا کررہے ہیں، ان کی حوصلہ افزائی بیرون ملک سے ترسیلات کی آمد میں اضافے کا سبب بنے گی۔

صدر کراچی چیمبر آف کامرس اینڈ انڈسٹری کے صدر جنید اسماعیل مکدہ اور نائب صدرر آصف شیخ جاوید نے کہا کہ کراچی چیمبر اور لاہور چیمبر آف کامرس کے اشتراک سے دونوں شہروں کی تاجر برادری کو درپیش مسائل کے حل میں آسانی ہو گی۔ انہوں نے کہا کہ ملک کی برآمدات میں اضافہ کرنے کی بے حد ضرورت ہے ، تاہم برآمدی پیداوار والی صنعتوں کے مسائل کے مسائل کو سب سے پہلے حل کیا جا چاہیے۔