برآمدات بڑھانے کیلئے بیرون ملک پاکستانی اشیاء کی نمائشوں کا اہتمام کیا جائے ‘ پیاف

لاہور (اُردو پوائنٹ اخبارتازہ ترین - این این آئی۔ 14 دسمبر2018ء) پاکستان انڈسٹریل اینڈ ٹریڈرز ایسوسی ایشنز فرنٹ (پیاف) نے حکومت سے مطالبہ کرتے ہوئے کہا ہے کہ غیر ضروری درآمدات پر قابو پانے کیلئے مزیداقدامات کیے جائیں کیونکہ درآمدات میں اضافہ اور برآمدات میں کمی ملکی معیشت کیلئے خطرہ ہے اور تجارتی خسارہ میں اضافہ اور زرمبادلہ کے ذخائر کمی کا شکار ہیں ۔

اس لیے غیر ضروری اشیاء کی درآمدات میں کمی اور برآمدات میں اضافہ کیلئے مثبت اقدامات کی ضرورت ہے ورنہ تجارتی خسارہ بڑھتا جائے گا ۔ درآمدات میں اضافہ سے تجارتی خسارہ بڑھنے سے زرمبادلہ کے ذخائر کمی کا شکار ہیں جبکہ آئی ایم ایف کے مطابق 2023تک پاکستان کو قرضوں اور سودکی مد میں انیس ارب ڈالر سالانہ ادا کرنا ہونگے جس کیلئے ابھی سے اقدامات کی ضرورت ہے ورنہ ملک دیوالیہ ہوجائے گا اس لیے ملکی برآمدات میں اضافہ کیلئے پیداواری لاگت میں کمی کیلئے بجلی و گیس کی قیمتوں میں کمی کے ساتھ ساتھ غیر ضروری اور پر تعیش اشیاء کی درآمدات پر پابندی کے ساتھ ساتھ بیرون ملک پاکستانی اشیاء کی نمائشوں کا اہتمام کیا جائے تاکہ ملکی برآمدات اور زرمبادلہ کے ذخائر میں اضافہ سے ملک خوشحالی و ترقی کی راہوں پر گامزن ہو۔

(جاری ہے)

ان خیالات کا اظہار پاکستان انڈسٹریل اینڈ ٹریڈرز ایسوسی ایشنز فرنٹ کے چیئرمین میاں نعمان کبیر سیئنر وائس چیئرمین پیاف ناصر حمید خان وائس چیئرمین جاوید اقبال صدیقی نے صنعتکاروں کے وفد سے گفتگو کرتے ہوئے کیا ۔انھوں نے کہاکہ برآمدات میں کم شرح سے اضافہ ہونے اور درآمدات میںزیادہ شرح سے اضافے سے کرنٹ اکائونٹ خسارہ بڑھتا جارہا ہے۔

برآمدات اور درآمدات کے بل میں واضح فرق کی وجہ سے بیرونی قرضوں کی واپسی اور اخراجات اور درآمدی بل 14.7% بڑھنے سے خسارہ جی ڈی پی سے 5.7% تک پہنچ گیا ہے ۔ زرمبادلہ کے ذخائر پر مسلسل دبائو بڑھ رہا ہے۔تجارتی خسارہ بہتر کرنے کے لئے درآمدات کو گھٹانے کے لئے سخت اقدامات کئے جائیںٹیکسٹائل کا شعبہ جسے ہماری معیشت میں بنیادی اہمیت حاصل ہے اور جو روزگار کے مواقع پیدا کرنے میں سب سے آگے ہے، بدستور مسائل کا شکار ہے۔

ملکی برآمدات میں اضافہ سے ہی ملکی صنعت ترقی کرے گی درآمدات میں اضافہ سے تجارتی خسارہ بڑھتا جارہا ہے اور حکومت کے ریونیو میں مسلسل کمی واقع ہورہی ہے چیئرمین پیاف نے کہاکہ تجارتی خسارہ کم کرنے کیلئے سنجیدہ اقدامات کی ضرورت ہے کیونکہ اس میں تشویشناک حد تک اضافہ ہوگیا ہے۔ تجارتی خسارہ کنٹرول کرنے کیلئے برآمدات میں اضافے اور درآمدات میں کمی کیلئے جنگی بنیادوں پر اقدامات کیے جائیں۔

حکومت کو چاہیے کہ ملکی برآمدات اور درآمدات کو متوازن رکھا جائے اور اگر برآمدات میں اضافے کے ساتھ ساتھ درآمدات میں کمی کے لئے ترجیحی بنیادوں پر اقدامات نہ کیے گئے تو رواں مالی سال کے اختتام تک تجارتی خسارے کا حجم 25 ارب ڈالر تک پہنچنے کا احتمال ہے جسکے نتیجے میں ایک بار پھر غیر ملکی قرضوں پر انحصار کرنا پڑے گا۔