آئل کمپنیوں کی گزشتہ سال کے دوران تیل و گیس کی تلاش کی بھرپور سرگرمیاں

آئل کمپنیوں کی گزشتہ سال کے دوران تیل و گیس کی تلاش کی بھرپور سرگرمیاں
اسلام آباد (اُردو پوائنٹ اخبارتازہ ترین۔ 10 جنوری2019ء) ملک میں تیل وگیس تلاش کرنے والی کمپنیوں نے گزشتہ سال کے دوران تیل وگیس کی تلاش کی سرگرمیاں بھرپورانداز میں جاری رکھیں اوراس دوران 437 مربع کلومیٹر کے علاقہ کی 2 ڈی اور1240 مربع کلومیٹر علاقہ کا تھری ڈی سیسمک سروے مکمل کیا گیا، اس کے ساتھ ساتھ تیل وگیس کے ممکنہ علاقوں میں 93 کنووئوں کی کھدائی (ڈرلنگ) کی گئی۔

سرکاری ذرائع نے ’’اے پی پی‘‘ کو بتایا کہ ان میں سے بعض کنوئویں تجزیاتی مراحل میں ہیں جبکہ 13 میں نئی دریافتیں ہوئی ہیں ، صرف گزشتہ 4 مہینوں میں 105.18 ایم ایم سی ایف ڈی اور5 ہزار358 بیرل یومیہ تیل کی دریافت ہوئی ہے ۔پاکستان پیٹرولئیم لیمیڈ( پی پی ایل) نے اگست 2018ء میں سندہ کے ضلع سانگھڑ میں یومیہ 23 ملین کیوبک فٹ گیس اور91 بیرل تیل کی دریافت کی ہے۔

(جاری ہے)

ستمبر میں پی پی ایل نے ضلع چکوال میں تیل کا ذخیرہ دریافت کیا جس کا ابتدائی بہائو 313 بیرل یومیہ ہے۔اسی کمپنی نے 3 اور4 دسمبر کو سانگھڑ اورضلع سجاول میں بالترتیب 18.6 ایم ایم سی ایف ڈی گیس اور160 بیرل یومیہ خام تیل دریافت کیا۔آئل اینڈ گیس ڈولپمنٹ کارپوریشن (اوجی ڈی سی ایل ) نے خیبرپختونخوا کے ضلع کوہات میں ستمبر کے مہینے میں 1.3 ایم ایم سی ایف گیس اور550 بیرل یومیہ تیل دریافت کیا۔

اسی طرح ماڑی پیٹرولیم لیمیٹڈ نے بلوچستان کے ضلع کچھی میں یومیہ 15 سو بیرل خام تیل کا ذخیرہ دریافت کرنے میں کامیابی حاصل کی۔یونائٹڈ انرجی پاکستان لیمیٹڈ نے ٹنڈوالہ یار اورٹنڈومحمد خان میں پانچ مقامات پر تیل وگیس کی دریافت میں کامیابی حاصل کی ۔پی اوایل نے خیبرپختونخوا میں 27 بیرل یومیہ تیل کے ایک ذخیرے کو دریافت کرنے میں کامیابی حاصل کی۔

ذرائع نے بتایاکہ پیٹرولیم ڈویژن تیل وگیس تلاش کرنے والی کمپنیوں کومزید علاقوں میں بلاکس دینے پرکام کررہی ہے۔ذرائع کے مطابق تیل وگیس تلاش کرنے والی کمپنیوں نے رواں مالی سال کے دوران 90 مقامات پر تیل وگیس کیلئے کنوئویں کھودنے کی منصوبہ بندی کی ہے۔ جن میں سے 50 دریافتی اور40 ڈولپمنٹل ہیں۔اسی طرح حکومت نے رواں سال کیلئے 33.50 ملین بیرل خام تیل اور1.473 ٹریلین کیوبک فٹ گیس کی دریافت کا ہدف مقررکیاہے۔

Your Thoughts and Comments