امریکی پابندیاں،ٹوکیو الیکٹران کا چینی کمپنیوں کو ٹیکنالوجی مصنوعات کی فراہمی بند کرنے کا اعلان

امریکی پابندیاں،ٹوکیو الیکٹران کا چینی کمپنیوں کو ٹیکنالوجی مصنوعات ..
ٹوکیو (اُردو پوائنٹ اخبارتازہ ترین - اے پی پی۔ 11 جون2019ء) دنیا بھر میں سیمی کنڈیکٹر تیاری کے آلات سپلائی کرنے والی تیسری بڑی کمپنی ’’ ٹوکیو الیکٹران ‘‘ نے امریکا کی جانب سے چینی کمپنیوں کو بلیک لسٹ قرار دینے کے بعد انھیں ٹیکنالوجی مصنوعات کی فراہمی بند کرنے کا اعلان کردیا،اس فیصلے سے ظاہر ہوتا ہے کہ چینی کمپنی ہواوے ٹیکنالوجیز سمیت اس کی دیگر کمپنیوں کو ٹیکنالوجی کی ٹرانسفر پر پابندی کے فیصلے پر وہ غیر امریکی کمپنیاں بھی عمل کررہی ہیں جن پر امریکی قوانین کی پابندی لازمی بھی نہیں۔

(جاری ہے)

ٹوکیو الیکٹران کے ایک ایگزیکٹو نے رائٹرز کو بتایا کہ امریکا کی جانب سے چینی کمپنیوں کو بلیک لسٹ قرار دینے کے فیصلے پر پوری طرح عمل کرتے ہوئے انھیں ٹیکنالوجی مصنوعات کی سپلائی نہیں کی جائے گی۔انھوں نے کہا کہ ٹوکیو الیکٹران اور امریکا کی 1960 ء سے شراکت داری ہے اور امریکی حکومت و صنعتی شعبہ ہمیں مثبت نظر سے دیکھتے ہیں چنانچہ ہمارے لیے چینی کمپنیوں کو ٹیکنالوجی مصنوعات کی فراہمی ممکن نہیں۔ یاد رہے کہ چین جو اس وقت امریکا کے ساتھ تجارتی جنگ میں پھنس چکا ہے،چپ ساز مشینری کی تیاری کے لیے امریکا ، جاپان اور یورپی کمپنیوں پر انحصار کم سے کم کرنے کے لیے اپنی سیمی کنڈیکٹر انڈسٹری تعمیر کررہا ہے۔

Your Thoughts and Comments