ہزار روپے مالیت کے پرائزبانڈ رکھنے والے شہریوں کو اپنے پرائزبانڈ رجسٹر کروانے کیلئی31 مارچ 2020ء تک کی ڈیڈ لائن

اسلام آباد ۔ (اُردو پوائنٹ اخبارتازہ ترین - اے پی پی۔ 20 جون2019ء) وفاقی وزارتِ خزانہ نے 40 ہزار روپے مالیت کے پرائزبانڈ رکھنے والے شہریوں کو اپنے پرائزبانڈ رجسٹر کروانے کیلئی31 مارچ 2020ء تک کی مہلت دیدی ہے۔ وزارت خزانہ، محصولات واقتصادی امورکی جانب سے جمعرات کو یہاں جاری بیان کے مطابق کابینہ کی اقتصادی رابطہ کمیٹی(ای سی سی) کے فیصلے کے مطابق 40 ہزار روپے مالیت کا پرائزبانڈ رکھنے والے کئی سہولیات سے استفادہ کر سکیں گے۔

40 ہزار روپے والے بیئر رپرائز بانڈہولڈر کو اپنے بانڈز کو سٹیٹ بینک آف پاکستان، نیشنل بینک آف پاکستان، یونائیٹڈ بینک، مسلم کمرشل بینک، الائیڈ بینک آف پاکستان، حبیب بینک آف پاکستان اور بینک الفلاح کی مجازبرانچوں سے رجسٹرڈ پرائز بانڈ میں تبدیل کروانے کی سہولت حاصل ہوگی۔

(جاری ہے)

40 ہزار روپے کا بیئرر پرائز بانڈ رکھنے والوں کو بانڈز کے بدلے میں ڈیفنس سیونگز سرٹیفیکٹس یا سپیشل سیونگز سرٹیفکیٹس اسٹیٹ بینک آف پاکستان، کمرشل بینکس کی مجاز برانچوں یا مراکز قومی بچت سے حاصل کرنے کی سہولت بھی حاصل ہوگی ۔

ڈیفنس سیونگز سرٹیفیکٹس اور سپیشل سیونگز سرٹیفکیٹس پر منافع کی شرح پہلے سے ہی پرکشش رکھی گئی ہے۔ ڈیفنس سیونگز سرٹیفکیٹس پرسالانہ منافع 12.41 فیصد اور سپیشل سیونگز سرٹیفیکٹس پر اوسط سالانہ منافع 11.57 فیصد ہے۔ بیان کے مطابق 40 ہزار روپے کابیئرر پرائز بانڈرکھنے والے صارفین اگر اسے کیش کرانا چاہیں تو یہ رقوم پرائز بانڈ ہولڈر کے دئیے گئے اکاؤنٹ میںجمع کر دی جائیں گی۔

اس سلسلے میں اسٹیٹ بینک آف پاکستان اور تمام بینکس ان کی پوری معاونت کریں گے تاکہ رقوم ان کے متعلقہ بینک اکاؤنٹ میں چلی جائے۔بیان میں کہا گیاہے کہ 40 ہزار روپے کے بیئرر پرائز بانڈز 31 مارچ 2020ء تک رجسٹرڈ کروائے جاسکتے ہیں اور بیئرر بانڈ ہولڈر مندرجہ بالاکسی ایک یا تینوں سہولتوں سے استفادہ کر سکتے ہیں ۔بیان میں وضاحت کی گئی ہے 40 ہزار روپے کا بیئرر بانڈ رکھنے والوں کا سرمایہ محفوظ رہے گا ۔

اقتصادی رابطہ کمیٹی کے اجلاس میں یہ بھی فیصلہ کیا گیا کہ40 ہزارروپے مالیت کے بیئرر بانڈز کی مزید قرعہ اندازی نہیں ہوگی۔ نیشنل پرائز بانڈز قوانین مجریہ 1999ء کے تحت سابقہ قرعہ اندازیوں میں جیتے گئے انعامات قرعہ اندازی کی تاریخ سے 6 سال کی مدت کے اندر اندرحاصل کرنے کی سہولت بدستور برقرار رہے گی۔ 40 ہزار روپے والا رجسٹرڈ پرائز بانڈ 10 مارچ 2017ء کو جاری کیا گیا تھا۔

اس کی نمایاں خصوصیات میں بانڈ ہولڈر کو نہ صرف قرعہ اندازی کے ذریعے انعام مل سکتا ہے بلکہ ششماہی کوپن کے ذریعے سال میں دو دفعہ مناسب شرحِ منافع پر ادائیگی بھی ہوتی ہے۔ یہ ادائیگیاں خود کار طریقے سے بانڈ ہولڈر کے دئیے گئے بینک اکاؤنٹ میں ہوتی ہیں۔40,000 ہزار روپے والے رجسٹرڈ پرائز بانڈ پر انعامی رقوم بیئرر بانڈز کی نسبت زیادہ پرکشش ہونے کے ساتھ ساتھ رجسٹرڈ بانڈزدرحقیقت زیادہ محفوظ اور غبن و چوری سے مبرا ہیں۔ وزارتِ خزانہ 14 فروری 2019ء سے 40 ہزار روپے والے بیئرر پرائز بانڈ کا مزید اجراء پہلے ہی بند کر چکی ہے۔ باقی تمام مالیت کے مختلف بیئرر پرائز بانڈز کا کاروبار اور لین دین بشمول قرعہ اندازی حسب سابق جاری رہے گا۔