حکومت سندھ اور بلدیاتی اداروں کی حیدرآباد کی حالت سدھارنے کی طرف کوئی توجہ نہیں

تاریخی شہر کی عظمت رفتہ کو بحال کرنے کے لیے وفاقی بجٹ میں خصوصی ترقیاتی پیکج منظور کیا جائے، صدر حیدرآباد چیمبر آف سمال ٹریڈرز اینڈ سمال انڈسٹری

بدھ 26 جون 2019 16:36

حیدرآباد (اُردو پوائنٹ اخبارتازہ ترین - اے پی پی۔ 26 جون2019ء) حیدرآباد چیمبر آف سمال ٹریڈرز اینڈ سمال انڈسٹری کے صدر محمد فاروق شیخانی نے وزیر اعظم عمران خان سے مطالبہ کیا ہے کہ حیدرآباد کی ماضی کی عظمت کو بحال کرنے کے لیے سال 2019-20 کے وفاقی بجٹ میں 10، اًرب روپے کا خصوصی ترقیاتی پیکج منظور کیا جائے۔ اُنہوں نے کہا حیدرآباد ماضی میں کراچی اور لاہور کے بعد تیسرا بڑا شہر تھا، پھر وہ زمانہ آیا کہ یہاں قتل و غارت اور بھتہ خوری کا دور دورہ ہوگیا۔

اس صورتحال اور نامناسب سہولتوں کے سبب صنعتکاروں نے بھی حیدرآباد سے اپنا کاروبار سمیٹنا شروع کردیا اور اُن شہروں کی طرف منتقل کردیا جہاں ضروری بنیادی سہولتیں موجود تھیں ، انڈسٹری سے متعلق یہ شہر اُجڑتا چلاگیا بعد ازاں بلدیاتی اداروں نے اور واسا نے رہی سہی کسر پوری کردی اور صحت و صفائی کے لحاظ سے اِس کی صورت بگاڑ کر رکھ دی، اًب حیدرآباد کا نمبر پاکستان کے شہروں میں آٹھویں یا نویں نمبر پر چلا گیا ہے اور دِن بدن اِس کے بگاڑ میں اضافہ ہی ہوتا چلا جارہا ہے۔

(جاری ہے)

سڑکیں ٹوٹ پھوٹ کا شکار ہیں، نالیاں نالے اور گٹر لائنیں بہہ رہی ہیں ، سڑکوں اور گھروں کو نقصان پہنچا رہی ہیں اور اِس وقت حیدرآباد کھنڈر کا منظر پیش کر رہا ہے، حکومت سندھ اور بلدیاتی اداروں کی حیدرآباد کی حالت سدھارنے کی طرف کوئی توجہ نہیں ہے، ادارے اپنے فرائض کی انجام دہی میں ناکام ہوچکے ہیں اِس لیے ایسے گمبھیر حالات میں اِس بات کی ضرورت ہے کہ وفاقی حکومت حیدرآباد کی تعمیر و ترقی، صحت و صفائی اور انڈسٹریلائزیشن کی طرف فوری توجہ دے، حیدرآباد میں 100 بستروں پر مشتمل ہسپتال قائم کرے ، وعدے کے مطابق وفاقی یونیورسٹی کے قیام کو ہر ممکن بنائے، اِس سلسلے میں موجودہ بجٹ میں 10 اًرب روپے مخصوص کر کے گورنر سندھ کی نگرانی میں یہاں ترقیاتی کام کرائے جائیں تاکہ حیدرآباد دوبارہ سے زندہ شہروں میں شمار ہوسکے۔