حکومت فکسڈ ٹیکس معاملات پر تاجر برادری کی تجاویز کو ملحوظ خاطر رکھے، لاہور چیمبر کا مطالبہ

حکومت فکسڈ ٹیکس معاملات پر تاجر برادری کی تجاویز کو ملحوظ خاطر رکھے، ..
لاہور (اُردو پوائنٹ اخبارتازہ ترین - اے پی پی۔ 11 ستمبر2019ء) لاہور چیمبر کے سینئر نائب صدر خواجہ شہزاد ناصر اور نائب صدر فہیم الرحمن سہگل نے کہا کہ پالیسی میکرز معاشی درستگی اور کاروباری ماحول کی بہتری کیلئے زمینی حقائق کو مدنظر رکھتے ہوئے اقدامات کریں۔ ایک بیان میں انہوں نے کہا کہ صنعت، تجارت اور معیشت کے مسائل حل کرنے کیلئے حقیقت کی طرف دیکھنا ہوگا، حکومت تاجر برادری کو شراکت دار سمجھتے ہوئے ان کے مسائل حل کرے۔

انہوں نے مطالبہ کیا کہ فکسڈ ٹیکس سمیت دیگر ٹیکس معاملات پر تاجر برادری کی تجاویز پر عمل درآمد کیا جائے جس سے نہ صرف کاروباری ماحول بہتر ہوگا بلکہ حکومت کے محاصل بھی بڑھیں گے۔ انہوں نے کہا کہ تاجر برادری کی خواہش کے مطابق فکسڈ ٹیکس نظام متعارف کروانے سے ٹیکس نیٹ کو وسعت ملے گی اور حکومتی محاصل بڑھیں گے جبکہ حکومت کے انتظامی اخراجات میں بھی کمی آئے گی۔

(جاری ہے)

انہوں نے حکومت سے مطالبہ کیا کہ وہ نئے ٹیکس دہندگان کو 3سے 4 سال کے لیے ٹیکس اور آڈٹ سے استثنیٰ دے، ٹیکس ریٹرن فارم اُردو اورانگریزی زبانوں میں ایک صفحے پر مشتمل ہونا چاہیے کہ فائلر اسے آسانی سے مکمل کرسکے۔ انہوں نے کہا کہ ایسے اقدامات سے حکومت اور تاجر برادری میں اعتماد سازی اور کاروبار کے لیے سازگار ماحول پیدا کیا جاسکتا ہے۔

Your Thoughts and Comments