حکومت تاجر برادری کو اعتماد میں لے اور ان کے تحفظات کو فوری دور کرے‘لاہورچیمبر

لاہور(اُردو پوائنٹ اخبارتازہ ترین - این این آئی۔ 16 اکتوبر2019ء) حکومت تاجر برادری کو اعتماد میں لے اور ان کے تحفظات کو فوری دور کرے، اور ان کی جانب سے پیش کی گئی تجاویز کو پالیسی سازی میں شامل کرے ۔ ان خیالات کا اظہار لاہور چیمبر کے صدر عرفان اقبال شیخ ، سینئر نائب صدر علی حسام اصغر اور نائب صدر میاں زاہد جاوید احمد نے مختلف مارکیٹوں اور صنعتی و تجارتی ایسوسی ایشنز کے وفود سے لاہور چیمبر میں ملاقات کے موقع پر کیا۔

لاہور چیمبر کے عہدیداروں سے فرووشاہد ملک کے ہمراہ میاں عبدالرزاق کی سربراہی میں فروو (فیروز پور روڈانڈسٹریل ویلفیئر آرگنائزیشن)کے وفد نے ملاقات کی ۔ میاں عبدالرزاق نے لاہور چیمبر کے عہدیداران کو آگاہ کیا کہ کچھ عرصہ قبل واسا لاہور کی جانب سے صنعتوں میں ایک کیوسک پانی کے ٹیوب ویل کی تنصیب پر 1لاکھ ماہانہ چارجز فکس کر دیئے ،خواہ پانی استعمال نہ بھی کریں،جبکہ واسا فیصل آباد کی جانب سے فی کیوسک پانی کے فکس ریٹ 19320مقرر کئے گئے ہیں۔

(جاری ہے)

انہوں نے دو شہروں میں پانی کے ریٹ میں اس قدر فرق کو غیر منصفانہ قرا ر دیتے ہوئے حکومت پر زور دیا کہ یہ نوٹیفیکیشن واپس لیا جائے اور تمام شہروں میں یکساں ریٹ فکس کئے جائیں۔اس کے علاوہ خرم الیاس کی سربراہی میں لاہور ٹائون شپ انڈسٹریل ایسوسی ایشن ، انیس ارشد کی سربراہی میں ہائیڈ مارکیٹ ٹریڈرز، مجاہد مقصود بٹ کی سربراہی میں ماربل اینڈ گرینائٹ اور اشرف بھٹی کی سربراہی میں انجمن تاجران کے وفد نے لاہور چیمبر کے عہدیداروں سے ملاقات کی اور درپیش مسائل اور ان کے حل کیلئے تجاویز سے آگاہ کیا۔

صدر لاہور چیمبر عرفان اقبال شیخ نے کہا کہ ٹیکسوں کے پیچیدہ نظام، دوہرے ٹیکسوں، زیادہ پیداواری لاگت ، مارکیٹوں میں انفراسٹرکچر کے فقدان اور بدترین ٹریفک جام جیسے مسائل کی موجودگی میں کاروبار ترقی نہیں کرسکتے۔انہوں نے حکومت پر زور دیا کہ ان مسائل کا حل ہونا تاجروں اور حکومت دونوں کے لیے یکساں فائدہ مند ہوگا۔ انہوں نے واسا پر بھی زور دیا کہ صنعتوں کیلئے پانی کے ماہانہ بھاری فکس چارجز کا فیصلہ واپس لیا جائے ،کیونکہ صنعتیں اس کی متحمل نہیں ہو سکتیں،صنعتوں کو پہلے ہی زیادہ پیداواری لاگت جیسے مسائل کا سامنا ہے تاہم پانی کے بھاری چارچز سے مشکلات میں مزید اضافہ ہو گا۔

سینئر نائب صدر علی حسام اصغر اورنائب صدر میاں زاہد جاوید احمد نے کہا کہ تاجر برادری اور حکومت کے درمیان اچھے اور متوازن تعلقات ملک کی معاشی ترقی کیلئے ناگزیرہیں، تاجروں کے فعال کردار کے بغیر معاشی استحکام ممکن نہیںلہذا حکومت ان کے حقیقی مسائل حل کرے اور کاروبار دوست ماحول پیدا کرنے کے لیے ہرممکن اقدامات اٹھائے۔ انہوں نے کہا کہ ٹیکسوں کے نظام میںاصلاحات کیلئے تاجر برادری کی مشاورت ضروری ہے ، ٹیکسوں کے نظام کو آسان بناکر تاجروں کو سہولت اور ٹیکس نیٹ کو وسعت دی جاسکتی ہے۔ انہوں نے کہا کہ فائلر اور نان فائلر کے درمیان تفریق کے لیے براہ راست کاروائی کی بجائے مارکیٹ ایسوسی ایشنز سے رابطہ کیا جائے تاکہ تاجروں اور ایف بی آر کے درمیان اعتماد سازی ہو۔