پاکستانی معیشت تسلسل و کامیابی سے استحکام کی جانب گامزن، مختلف شعبوں میں سرمایہ کاری کے بے شمار مواقع موجود ہیں جن سے امریکی سرمایہ کاروں اور کمپنیوں کو فائدہ اٹھانا چاہیے

واشنگٹن ۔ (اُردو پوائنٹ اخبارتازہ ترین - اے پی پی۔ 20 اکتوبر2019ء) وزیر اعظم کے مشیر برائے خزانہ و محصولات ڈاکٹر عبد الحفیظ شیخ نے کہا ہے کہ پاکستانی معیشت تسلسل اور کامیابی سے استحکام کی جانب گامزن ہے اور معیشت کے مختلف شعبوں میں سرمایہ کاری کے بے شمار مواقع موجود ہیں جن سے امریکی سرمایہ کاروں اور کمپنیوں کو فائدہ اٹھانا چاہیے۔ انہوں نے ان خیالات کا اظہار یو ایس پاکستان بزنس کونسل کی جانب سے اپنے اور ان کے ہمراہ پاکستانی وفد کے اعزاز میں واشنگٹن میں منعقدہ رائو نڈ ٹیبل ظہرانے سے خطاب کے دوران کیا۔

یہ وفد آئی ایم ایف اور عالمی بنک کے سالانہ اجلاسوں میں شرکت کے لیے ان کے ہمراہ امریکہ میں موجود ہے۔ڈاکٹر عبد الحفیظ شیخ نے پاکستان میں کاروباری آسانیاں پیدا کرنے کی حکومتی کاوشوں پر تفصیل سے روشنی ڈالی اور امریکی کمپنیوں اور سرمایہ کاروں کو پاکستان میں اپنی سرمایہ کاری کا حجم بڑھانے کی دعوت دی۔

(جاری ہے)

رائو نڈ ٹیبل میں ایس اینڈ پی گلوبل،پیپسی کولا، موٹرولا سلوشنز انک، سٹی، گوگل، ایکسن موبل اور دیگر ملٹی نیشنل کمپنیوں کے عہدیدار موجود تھے۔

مشیر خزانہ اور ان کے ہمراہ پاکستانی وفد نے ایشیائی ترقیاتی بینک (اے آئی آئی بی) کے صدر جِن لی کون سے بھی ملاقات کی اور پاکستان میں بنک کی پورٹ فولیو سرمایہ کاری پر تبادلہ خیال کرنے کے علاوہ معیشت کے ان شعبوں پر بات کی جن میں بینک کی جانب سے سرمایہ کاری کے امکانات موجود ہیں۔ صدر جِن لی کون نے پاکستانی کی معاشی تعمیر و ترقی کے ایجنڈے کی تکمیل کے لیے ایشین ڈویلپمنٹ بینک کی مکمل حمایت اور تعاون کا اعادہ کرتے ہوئے پاکستان کے ترجیحی ترقیاتی شعبوں میں بینک کی جانب سے مالی امداد بڑھانے کی پیشکش کی۔

صدر جِن لی کون نے کہا کہ انفرا سٹرکچر کی تعمیر و ترقی میں سرمایہ کاری کے مجموعی نشو ونماء اور ترقی پر دیرپا مثبت اثرات مرتب ہوتے ہیں۔ڈاکٹر عبد الحفیظ نے صدر جِن لی کون کو پاکستان کا دورہ کرنے کی دعوت دی جسے انہوں نے شکریہ کے ساتھ قبول کر لیا۔ ڈاکٹر عبد الحفیظ شیخ اور ان کے ہمراہ پاکستانی وفد نے اسلامی ترقیاتی بینک (آئی ڈی بی) کے صدر ڈاکٹر بندار ایم ایچ ہجار سے بھی ملاقات کی اور انہیں ملکی معیشت کی تازہ ترین صورت حال سے آگاہ کیا۔

ڈاکٹر عبد لحفیظ شیخ نے آئی ڈی بی کی جانب سے پاکستان کو مالی امداد کی فراہمی پر صدر ڈاکٹر بندار ایم ایچ ہجار کا شکریہ ادا کیا۔ ڈاکٹر ہجار نے ملاقات کے دوران پاکستانی وفد کو آگاہ کیا کہ آئی ڈی بی نے پاکستان کو ان ممالک کی فہرست میں چن لیا ہے جنہیں ان کی معیشت کے کلیدی شعبوں میں مارکیٹ مسابقت کو مستحکم بنانے کے لیے ترجیحی بنیادوں پر امداد فراہم کی جائے گی اور اس مقصد کے لیے بینک کا ایک وفد عنقریب پاکستان کا دورہ کرے گا۔

علاوہ ازیں واشنگٹن میں قیام کے دوران مشیر خزانہ و محصولات نے عالمی بینک کے ذیلی اور عالمی بینک گروپ کے رکن ادارے آئی ایف سی کی نائب صدر نِینا سٹوالج کووک سے بھی ملاقات کی جس دوران مشیر خزانہ کو آئی ایف سی کی جانب سے پاکستان میں بالخصوص شمسی اور ہوا سے توانائی کے حصول کے منصوبوں میں سرمایہ کاری کے آئندہ منصوبوں کے بارے میں آگاہ کیا گیا،آئی ایف سی کی جانب سے پاکستان میں نجی و سرکاری کاروباری شراکتوں کے ڈھانچے کو مزید بہتر بنانے کے لیے مشاورتی خدمات کی فراہمی میں دلچسپی کا اظہاربھی کیا گیا۔

واشنگٹن میں قیام کے دوران ڈاکٹر عبد الحفیظ شیخ اور ان کے وفد نے آئی ایم ایف اور عالمی بینک گروپ کے سالانہ اجتماعی اجلاس میں بھی شرکت کی جس سے عالمی بینک کے صدر ڈیوڈ میل پس اور آئی ایم ایف کی منیجنگ ڈائریکٹر کرسٹلینا جارجیوا نے بھی خطاب کیا۔