پاک ایران باہمی تجارت کو مزید وسعت دینے کی ضرورت ہے،مقصود انور پرویز

پشاور(اُردو پوائنٹ اخبارتازہ ترین - این این آئی۔ 05 نومبر2019ء) سرحد چیمبر آف کامرس اینڈ انڈسٹری کے صدر انجینئر مقصود انور پرویز نے پاک ایران باہمی تجارت کو مزید وسعت دینے پر زور دیتے ہوئے کہا ہے کہ اس سلسلے میں حکومت پاکستان اور ایران پالیسیوں میں نرمی ‘ ٹیرف میں کمی ‘ اور دو طرفہ تجارت میںرکاوٹیں کو دور کرنے کے لئے مشترکہ اور عملی اقدامات کئے جائیں اس ضمن میں دونوں ممالک کی بزنس کمیونٹی کے وفود کے تبادلوں سمیت جائنٹ ایگزیبیشن کے انعقاد اور بارڈر ایریا میں مارکیٹ کے قیام کی اشد ضرورت ہے ۔

ان خیالات کا اظہار انہوں نے گذشتہ روز پشاور میں تعینات ایرانی قونصل جنرل باقی بیگی کا دورہ سرحد چیمبر کے موقع پر ملاقات کے دوران کیا ۔ اس موقع پر سرحد چیمبر کے سینئر نائب صدر شاہد حسین ‘ ایگزیکٹو کمیٹی کے اراکین احسان اللہ ‘ شمس الرحیم ‘ مجیب الرحمان‘ الطاف بیگ ‘ ایرانی ڈپٹی قونصل جنرل سید ابراہیم دہنادی ‘ پی آر او امتیاز احمد ‘ صنعتکار اور تاجر رہنما بھی موجود تھے ۔

(جاری ہے)

سرحد چیمبر کے صدر انجینئر مقصود انور پرویز نے کہا کہ پاک ایران باہمی تجارت جو کہ تقریباًایک ارب ڈالرسے کم ہے کو 5 ارب ڈالر تک بڑھانے کی گنجائش موجود ہے ۔ انہوں نے ایرانی سرمایہ کاروں کو خیبر پختونخوا میں ہائیڈرل پاور جنریشن ‘ شہد اور دیگر اہم شعبہ جات میں سرمایہ کاری کرنے کی دعوت دی ۔ انہوں نے کہاکہ چاہ بہار اور گوادر بندرگاہوں پر دونوںممالک کے درمیان باہمی تعاون کے ذریعے تجارت کو فروغ دیا جائے ۔

انہوں نے پاک ایران جائنٹ چیمبر کے قیام کی بھی تجویز پیش کی ۔ انہوں نے کہاکہ پاکستان اور ایران کے درمیان خوشگوار تعلقات استوار ہیں جس کی بنیادی وجہ دونوں ممالک کی مذہب و رسم و رواج میں یکسانیت پائی جاتی ہے ۔ انہوں نے کہاکہ پاک ایران گیس پائپ لائن کے تحت 1000 میگاواٹ بجلی فراہمی کا منصوبہ دونوں ممالک کے درمیان تجارتی و اقتصادی تعلقات کومزید وسعت دینے کیلئے ایک سنگ میل پراجیکٹ ہے جس سے پاکستان میں صنعتی ترقی اور خوشحالی آئے گی ۔

انہوں نے کہاکہ اسلام آباد اور تہران کو موجودہ باہمی تجارتی حجم کو بڑھانے کے لئے ٹیرف میں کمی ‘ پالیسیوں میں نرمی لانے کے ساتھ تجارت کی راہ میں حائل رکاوٹوں کو دور کرنا ہوگا تاکہ دونوں ممالک کے درمیان ایک منظم تجارت کو فرو غ حاصل ہو اور غیر رسمی تجارت کا خاتمہ ہو ۔ انہوں نے کہاکہ ایران فریٹ اور ڈیوٹیز میں بھی کمی لائے ۔ اس موقع پر خطاب کرتے ہوئے ایران کے قونصل جنرل باقر بیگی نے کہا کہ پاکستان اور ایران کے درمیان بینکنگ چینل کا فقدان پاک ایران تجارت کو مزید وسعت دینے میں ایک بڑی رکاوٹ ہے ۔

انہوں نے کہاکہ پاکستان اور ایران کے درمیان باہمی تجارت کو مزید بڑھانے پر اتفاق ہوا ہے لیکن اس حوالے سے تاحال کوئی خاطر خواہ عملی اقدام نہیں اٹھایا گیا ۔ انہوں نے اس عزم کا اعادہ کیا کہ دونوں ممالک کے درمیان تمام معاہدوں کی جلد پاسداری کرتے ہوئے ایران اور پاکستان کے درمیان باہمی تجارت کو مزید فروغ دیا جائے گا ۔ انہوں نے کہاکہ پاکستان اور ایران کے عوام مذہبی ‘ باہمی قریبی رشتہ اور رسم و رواج کی وجہ سے ایک دوسرے کے کافی قریب ہیں اور اس روابط اور تعلقات کو مزید مضبوط بنانے کی اشد ضرورت ہے بالخصوص دونوں ممالک کے درمیان تجارتی تعلقات کو بڑھانے کے لئے حکومتی اور پرائیویٹ سطح پر اقدامات اٹھائے جائیں ۔

انہوں نے کہا کہ پاکستان اور ایران کے مابین باہمی تجارت کو 5 ارب ڈالرز تک بڑھانے کی گنجائش موجود ہے تاہم اس ضمن میں دونوں ممالک کو تجارت کی راہ میں حائل رکاوٹوں کو دور کرنے کے لئے مشترکہ اقدامات کرنے ہوں گے۔ انہوں نے پاکستانی سرمایہ کاروں کو ایران میں اہم شعبہ جات میں سرمایہ کاری کی دعوت دی ۔ انہوں نے کہاکہ ایرانی سرمایہ کار پاکستان میں ہائیڈرل پاور جنریشن سمیت وزیراعظم کی ہائوسنگ سکیم اور دیگر اہم شعبہ جات میں سرمایہ کاری کرنا چاہتے ہیں ۔

انہوں نے کہاکہ پاکستان میں نوجوان کی تعداد بڑی تیزی سے بڑھ رہی ہے اس لئے نوجوان کو چاہئے کہ ایران کی انفارمیشن ٹیکنالوجی اور بائیو ٹیکنالوجی سے بھرپور استفادہ حاصل کریں۔ انہوں نے کہاکہ ایران پاکستان کے ساتھ بارڈرز ایریا پر 7تجارتی منڈیاں قائم کرے گا جس کے ذریعے دونوں ممالک کے درمیان تجارتی تعلقات میں مزید اضافہ ہوگا۔ انہوں نے بتایا کہ چاہ بہار اور گوادر بندرگاہوں کو سسٹر پورٹ کا درجہ دیا گیا ہے ۔

انہوں نے کہاکہ ایران نے پاکستان اور بیرون سرمایہ کاروں کے لئے سپیشل مراعات کا اعلان کیا ہے ۔ انہوں نے کہاکہ پاکستان اور ایران کے درمیان مشترکہ کوششوں سے ہی دونوں ممالک کے درمیان جائنٹ چیمبر کا قیام ممکن ہوگا ۔ انہوں نے بتایا کہ پاکستان اور ایران کے درمیان ٹیرف پر نظرثانی کے حوالے سے ایران مشترکہ اقتصادی کمیشن کام کر رہا ہے ۔ ایرانی قونصل جنرل نے سرحد چیمبر کے صدر انجینئر مقصود انور پرویز کو سرحد چیمبر کا صدر منتخب ہونے پر مبارکباد پیش کی اور امید ظاہر کی کہ ان کی قیادت میں ایران اور پاکستان بالخصوص خیبر پختونخوا کے درمیان باہمی تجارت کو مزید فروغ دیا جائے گا۔