ڈیوٹی اور ٹیکسز کی کم شرح اور ٹیکس رعایتوں کی وجہ سے بلغاریہ سرمایہ کاری کیلئے بیحد منافع بخش ملک ہے‘ایلیکسینڈر باریسوف پاراشکوف

لاہور(اُردو پوائنٹ اخبارتازہ ترین - این این آئی۔ 25 جنوری2020ء) بلغاریہ کے سفیر ایلیکسینڈر باریسوف پاراشکوف نے کہا کہ ڈیوٹی اور ٹیکسز کی کم شرح اور ٹیکس رعایتوں کی وجہ سے بلغاریہ سرمایہ کاری کے حوالے سے بیحد منافع بخش ملک ہے، پاکستانی تاجروں کو بلغارین تاجروں کے ساتھ مل کر مشترکہ منصوبوں کے ذریعے بھرپور فائدہ اٹھانا چاہیے۔ ن خیالات کا اظہار انہوں نے لاہور چیمبر آف کامرس اینڈ انڈسٹری کے صدر عرفان اقبال شیخ سے لاہور چیمبر میں ملاقات میں کیا ۔

لاہور چیمبر کے نائب صدر میاں زاہد جاوید، شیخ خرم آفتاب ، ایگزیکٹو کمیٹی ممبر فیاض حیدرو دیگر بھی موقع پر موجود تھے۔ سفیر نے کہا کہ بلغاریہ میں قائم خصوصی اقتصادی زونز کے سرمایہ کاروں کے تمام سہولیات فراہم کرتے ہیں ۔

(جاری ہے)

انہوں نے کہا کہ پاکستان اور بلغاریہ کے درمیان 55 سال سے گہرے سفارتی اور مضبوط سیاسی تعلقات ہیں لیکن اب وقت آگیا ہے کہ دونوں ممالک کے مابین معاشی تعلقات کو مزید مستحکم کرنے کے لئے دونوں ممالک نجی شعبہ اپنا کردار ادا کرے۔

انہوں نے کہا کہ باہمی تجارتی اور معیشت کے فروغ کیلئے ایک دوسرے کی مارکیٹوں، کاروبار اور تجارت سے متعلق معلومات کے تبادلے کی اشد ضرورت ہے۔انہوں نے کہا کہ بلغاریہ یورپی یونین کی ممبر ریاست ہے اور اسے اس سلسلے میں بہت سارے فوائد حاصل ہیں۔ بلغاریہ یورپی یونین کی طرف ایک گیٹ وے کی حیثیت رکھتا ہے۔انہوں نے کہا کہ براستہ ایران دونوں ممالک کے مابین زمینی راستے کے ذریعے تجارت میں بہت سہولت مل سکتی ہے۔

لاہور چیمبر کے صدر عرفان اقبال شیخ نے نے جی ایس پی پلس کے سلسلے میں پاکستان کی مسلسل حمایت پر بلغاریہ کو سراہا ۔انہوں نے کہا کہ پاکستان اور بلغاریہ کے مابین گذشتہ چند سالوں سے مجموعی طور پر تجارت کا حجم تقریبا 33 ملین ڈالر ہے جو دوطرفہ تجارت کی اصل صلاحیت کی عکاسی نہیں کرتا۔ صدر لاہور چیمبر نے کہا کہ پاکستان سے بلغاریہ کو لیموں ، آم ، چاول ، ویلیو ایڈڈ ٹیکسٹائل ، کھجور ، فرنیچر اور سنگ مرمر وغیرہ برآمد کرنے کی کافی گنجائش موجود ہے،اس کے علاوہ انفارمیشن ٹیکنالوجی ، فوڈ پروسیسنگ ، آٹوموٹو ، لائیو اسٹاک ، سیاحت ، زرعی ٹیکنالوجی وغیرہ کے شعبے میں مشترکہ منصوبوں کے تحت دونوں ممالک اقتصادی تعاون بڑھا سکتے ہیں ۔

انہوں نے کہا کہ ممکنہ مواقع سے فائدہ اٹھانے کے لئے دونوں ممالک کے نجی شعبوںکے مابین روابط کو مضبوط کرنے کی اشد ضرورت ہے۔ یہ برآمدات کے فروغ کیلئے خصوصی وفود کے تبادلے اور تجارتی میلوں اور نمائشوں کے انعقاد کے ذریعہ کیا جاسکتا ہے۔ انہوں نے امید ظاہر کی کہ دوستی اور تعاون کا یہ جذبہ دونوں ممالک کے مابین تجارتی تعلقات کو بڑھانے میں بہت آگے بڑھے گا۔

لاہور چیمبر کے نائب صدر میاں زاہد جاوید احمد نے کہا کہ پاکستان اور بلغاریہ کے مابین تجارتی وفود کے تبادلے ، سنگل کنٹری نمائشوں ، تجارتی میلوں اور کیٹلاگ شو کے ذریعے معاشی تعلقات کو مزید تقویت مل سکتی ہے۔انہوں نے تجویز پیش کی کہ پاک بلغاریہ بزنس فورم کا قیام بھی تجارتی تعاون کو بڑھانے میں مددگار ثابت ہوسکتا ہے۔ انہوں نے لاہور میں بلغاریہ کے اعزازی کونسل کے تقرر کا بھی مشورہ دیا۔