ایس ای سی پی نے اینٹی منی لانڈرنگ اور کاوئنٹر ٹیرارزم فنانسنگ ریگولیشنز 2018 ء میں ترامیم تجویزکر دیں

بدھ 29 جنوری 2020 18:42

اسلام آباد ۔ (اُردو پوائنٹ اخبارتازہ ترین - اے پی پی۔ 29 جنوری2020ء) سکیورٹیز اینڈ ایکس چینج کمیشن آف پاکستان (ایس ای سی پی) نے اینٹی منی لانڈرنگ اور کاوئنٹر ٹیرارزم فنانسنگ ریگولیشنز 2018 (تطہیر زر اور دہشت گردی کی فنانسنگ کی روک تھام کے ضوابط) میں ترامیم تجویز کر دیں ہیں۔ گزشتہ جون میں نافذ کئے گئے ضوابط پر انڈسٹری کی جانب سے موصول ہونے والی تجاویز کی روشنی میں ترتیب دی گئی ترامیم فنانشل ایکشن ٹاسک فورس (ایف اے ٹی ایف) کی شفارشات اور بین الاقوامی معیارات کے عین مطابق ہیں۔

عوامی مشاورت کے لئے مجوزہ ترامیم کے مسودہ ایس ای سی پی کی ویب سائٹ پر فراہم کر دیا گیا ہے۔ اے ایم ایل ریگولیشنز میں مجوزہ ترامیم کا مقصد تطہیر زر اور دہشت گردی کی مالی معاونت کی روک تھام سے متعلق ایس ای سی پی کے انضباطی نظام کو مزید مستحکم بنانا ہے۔

(جاری ہے)

مجوزہ ضوابط میں منضبطہ افراد (Regulated Persons) بشمول سکیورٹیز بروکر، فیوچر بروکر، انشورنس ایجنٹ، تکافل آپریٹر، نان بینکنگ کمپنیوں اور مضاربہ کمپنیوں کے لئے نیشنل رسک ایسسمنٹ کے مطابق رسک بیس نظام کی مزید وضاحت کی گئی ہے جبکہ مالی پابندیوں پر عمل درآمد کو یقینی بنانے کے اقدامات تجویز کئے گئے ہیں۔

علاوہ ازیں، آسانی فراہم کرنے کے پیش نظر، صارفین کے لئے مطلوبہ احتیاط (Due diligence) اور اپنے صارف کو پہچاننے (Know your Customer) کے لئے مطلوبہ معلومات کی فہرست فراہم کر دی گئی ہے۔ اس کے علاوہ حقیقی ملکیت کے تصور کو مزید واضح کر دیا گیا ہے تاکہ حقیقی مالک، اس کے قریبی رفقاء اور خاندان کے افراد کی تصدیق اور شناخت ہو سکے۔ مجوزہ ضوابط میں منضبطہ افراد کو اپنے صارفین کے اکاوئنٹ کی مانیٹرنگ کے لئے ٹیکنالوجی کے استعمال کی حوصلہ افزائی کی گئی ہے۔

ایس ای سی پی نے اے ایم ایل ضوابط کے نفاذ کے بعد سے، انڈسٹری کی جانب سے موصول ہونے والی تجاویز و آراء کے نتیجے میں ضوابط کو بہتر بنانے کی پوری کوشش کی ہے۔ دلچسپی رکھنے والے افراد مجوزہ ترامیم پر اپنی آراء و تجاویز فروری 27 تک ایس ای سی پی کو بھجوا سکتے ہیں۔ ایس ای سی پی کو موصول ہونے والی آراء و تجاویز کی روشنی میں مجوزہ ترامیم کو حتمی شکل دی جائے گی۔