کے الیکٹرک کی اجارہ داری ختم کی جائے، سراج تیلی

کراچی (اُردو پوائنٹ اخبارتازہ ترین - این این آئی۔ 03 جولائی2020ء) چیئرمین بزنس مین گروپ و سابق صدر کراچی چیمبر آف کامرس اینڈ انڈسٹری سراج قاسم تیلی نے کے الیکٹرک کو حد سے زیادہ لوڈ شیڈنگ کرنے اور 2005 میں کے ای ایس سی کی نجکاری سے آج تک بلاتعطل بجلی کی فراہمی یقینی بنانے میں ناکامی پر کڑی تنقید کرتے ہوئے کہا کہ 2023 میں کے الیکٹرک کا معاہدہ ختم ہونے جارہا ہے لہذا اگلے معاہدے کو انتہائی سمجھداری سے کچھ اس طرح تیار کرنا ہوگا جس کے ذریعے کے الیکٹرک کی موجودہ اجارہ داری کو ختم کیا جا سکے جس سے یہ ادارہ کئی برسوں سے لطف اندوز ہوتا چلا آرہا ہے۔

انھوں نے کہا کہ موجودہ معاہدے کے تحت کے الیکٹرک نے اپنی نجکاری سے ہی بغیر کسی مقابلے کے خوف کے پورے بجلی کی پیداوار اورترسیل نیٹ ورک پر اجارہ داری قائم کر رکھی ہے تاہم اب وقت آگیا ہے کہ اس اجارہ داری کو ختم کیا جائے کیونکہ اس کی وجہ سے کے الیکٹرک کو یہ آزادی حاصل ہے کہ وہ بلاخوف غریب عوام کے ساتھ زیادتیاںجاری رکھے جو شدید گرمی کے موسم میںدن بھر حتٰی کے رات میں بھی کئی گھنٹوں تک طویل المیعاد اور غیر اعلامیہ لوڈ شیڈنگ بھگت رہے ہیں۔

(جاری ہے)

ایک بیان میں سراج تیلی نے کہا کہ حکومت کے الیکٹرک اور شنگھائی الیکٹرک چائینہ کے درمیان ہونے والے مذاکرات میں شامل ہے جو کے الیکٹرک کے 66.4فیصدحصص کو حاصل کرنے کا ارادہ رکھتی ہے تاہم مستقبل میں چاہے کے الیکٹرک کو شنگھائی الیکٹرک سنبھالے یا موجودہ مالکان ہی برقرار رہیں، بجلی فراہم کرنے والے ادارے کے سے ساتھ کیا گیا موجودہ معاہدہ قابلِ قبول نہیں اور کسی بھی قیمت پر اس کا دوبارہ جائزہ لینا ہی ہوگا۔

کے الیکٹرک کی نجکاری سے ہی کراچی والوں کو بہت برا تجربہ رہا کیونکہ بجلی فراہم کرنے والے ادارے سے کئے گئے معاہدے کو کبھی عوام کے سامنے فاش نہیں کیا گیا جس میں بے پناہ خامیاں اور خرابیاں موجود ہیں۔ لہذا اگلے معاہدے میں ان تمام تر خامیوں و خرابیوں کو دور کرنے کے ساتھ ساتھ اجارہ داری قائم کرنے کی کوئی گنجائش نہیں ہونی چاہئے۔ کے الیکٹرک کی اجارہ داری کے باعث صارفین کے پاس کوئی اور راستہ نہیں سوائے اس کے کہ وہ کے الیکٹرک کی ذیادتیوں کو برداشت کریں۔

کے الیکٹرک کی اجارہ داری کے اختتام پزیر ہونے سے یقینا دیگر کمپنیاں بجلی کی پیداوا ر اور ترسیل کے شعبے میں داخل ہوں گی، مسابقت کو فروغ حاصل ہو گا اور صارفین کو یہ آزادی حاصل ہو گی کہ وہ چاہیں تو کے الیکٹرک سے بجلی حاصل کریں یا پھر کسی اور سے جو بھی ان کی بجلی کی طلب کو پورا کرنے کی صلاحیت رکھتا ہو۔انھوں نے رائے دیتے ہوئے کہا کہ کراچی کی آبادی اور رقبے کو مدنظر رکھتے ہوئے پورے بجلی پیداوار و ترسیل کے نیٹ ورک کو تین سے چار بجلی کے سپلائرز کے مابین بانٹ دیا جائے تاکہ نہ صرف کے الیکٹرک بلکہ دیگر کمپنیاں بھی مختلف علاقوں میں بجلی کی طلب کو پورا کرنے کے لئے میدان میں آجائیں اوران میں سے کوئی بھی اپنی اجارہ داری قائم نہ کرپائے۔

چیئرمین بی ایم جی کہا کہ ہم اُمید کرتے ہے کہ جتنا جلد ممکن ہو حکومت اس سنگین مسئلے پر توجہ دے گی اور تمام تر چیلینجز کے باوجود قومی خزانے میں 70فیصد سے ذائد کا ریونیو جمع کروانے والے ملک کے سب سے بڑے شہر کے باسیوں اور تاجر و صنعتکار برادری کی مشکلات کو کم کرنے کے لئے ٹھوس اقدامات عمل میں لائے گی۔کراچی چیمبر کے صدر آغا شہاب احمد خان نے زور دیا کہ کے الیکٹرک فوری طور پر شہر بھر میں جاری لوڈ شیڈنگ کے سلسلے کو ختم کرے اور انفراسٹرکچربالخصوص بجلی پیدا کرنے کی صلاحیت اور ترسیل کے نیٹ ورک کو بہتر بنانے پر توجہ دے جو انتہائی بری حالت میں ہے۔

انھوں نے کہاکہ کے الیکٹرک کی ناقص کارکردگی کی وجہ سے شہر کے تمام ہی علاقوں اور ساتوں صنعتی زونز میں ہر روز ہی کئی گھنٹوں تک غیر اعلامیہ لوڈ شیڈنگ اور بجلی معطلی کا سلسلہ جاری ہے جس کے نتیجے میں کافی نقصانات ہو رہے ہیں۔کے الیکٹرک کی غیر اعلامیہ اور طویل المیعاد لوڈشیڈنگ صنعت و معیشت کے تابوت میں آخری کیل ثابت ہوگی۔