آئندہ دس سال کے دوران پاکستان میں مکانات کی ضرورت20 ملین یونٹس تک بڑھ جائے گی، ماہرین

پیر 6 جولائی 2020 10:45

اسلام آباد ۔ (اُردو پوائنٹ اخبارتازہ ترین - اے پی پی۔ 06 جولائی2020ء) آئندہ دس سال کے دوران پاکستان میں مکانات کی ضرورت20 ملین یونٹس تک بڑھ جائے گی۔ پاکستان کے صرف 0.5 فیصد رقبہ پر منصوبہ بندی کے تحت شہری آبادیاں قائم کی گئی ہیں۔ ریئل اسٹیٹ کا شعبہ پاکستانی معیشت کی ترقی میں اہم کردار ادا کرسکتا ہے۔ شعبہ کے ماہرین نے قوانین کو اپ ڈیٹ کرنے اور ٹیکس کے نظام میں سہولیات کی ضرورت پر زور دیا ہے جس سے شعبہ میں غیر ملکی سرمایہ کاری میں خاطر خواہ اضافہ کیا جاسکتا ہے۔

گھرانہ ڈاٹر کام کے چیف ایگزیکٹو آفیسر شفیق اکبر نے کہا ہے کہ پاکستان میں تقریباً4 ہزار مربع کلومیٹر رقبہ پر منصوبہ بندی کے تحت آبادیاں قائم کی گئی ہیں جبکہ مزید 8 لاکھ 81 ہزار 913 مربع کلومیٹر رقبہ سے استفادہ کیلئے منصوبہ بندی کی ضرورت ہے۔

(جاری ہے)

انہوں نے کہا کہ منصوبہ بندی کے تحت قائم کی گئی آبادیوں کی زیر استعمال زمین کی قیمت دو کھرب ڈالر کے قریب ہے جبکہ مزید منصوبہ بندی کے ذریعے ریئل سٹیٹ کے شعبہ کی مارکیٹ کو چار کھرب ڈالر تک توسیع دی جاسکتی ہے۔

انہوں نے کہا کہ آئندہ دس سال کے دوران پاکستان میں رہائشی سہولتوں کی ضرورت 20 ملین یونٹس تک بڑھ جائے گی۔ انہوں نے کہا کہ شعبہ کی ترقی سے روزگار کے 50 لاکھ مواقع پیدا کئے جاسکتے ہیں جبکہ تعمیرات کے شعبہ سے وابستہ دیگر ذیلی صنعتوں کے فروغ سے بھی روزگار کے مزید لاکھوں نئے مواقع پیدا کرنے میں مدد حاصل کی جاسکتی ہے۔ شفیق اکبر نے مزید کہا کہ ریئل اسٹیٹ کا شعبہ ملکی معیشت کی ترقی ک اہم کردار ادا کر سکتا ہے۔

اس حوالے سے پراپرٹی کے موجودہ قوانین کو اپ ڈیٹ کرنے کے علاوہ ٹیکس کے نظام میں سہولیات کی ضرورت ہے۔ انہوں نے کہا کہ حکومت کے ان اقدامات سے نہ صرف قومی معیشت ترقی کرے گی بلکہ روز کے لاکھوں نئے مواقع پیدا کرنے، شعبہ سے جڑی ذیلی صنعتوں کی ترقی کے علاوہ غیر ملکی سرمایہ کے فروغ میں بھی مدد ملے گی۔