حکومت پاکستان میں ایل پی جی کی مقامی پیداوار پر سے امتیازی ٹیکسز اورپٹرولیم لیوی ختم کرے ‘ لاہور چیمبر

لاہور(اُردو پوائنٹ اخبارتازہ ترین - این این آئی۔ 11 اگست2020ء) حکومت پاکستان میں ایل پی جی کی مقامی پیداوار پر سے امتیازی ٹیکسز اورپٹرولیم لیوی ختم کرے تاکہ یہ اہم انڈسٹری بقا کی جنگ لڑ سکے۔ ان خیالات کا اظہار لاہور چیمبر کے صدر عرفان اقبال شیخ، چیئرمین پاکستان ایل پی جی مارکیٹرز ایسوسی ایشن فاروق افتخار ،لاہور چیمبر کے سینئر نائب صدر علی حسام اصغر اور نائب صدر میاں زاہد جاوید و دیگر نے لاہور چیمبر میں منعقدہ اجلاس سے خطاب کرتے ہوئے کیا۔

لاہور چیمبر کے سابق صدر میاں مصباح الرحمن، سابق سینئر نائب صدر میاں نعمان کبیر، اسد احسان، ایم بلال، فیاض حیدر، حارث عتیق ، شہریار علی و دیگر بھی اس موقع پر موجود تھے۔ انہوں نے کہا کہ مقامی ایل پی جی کی تیاری پر 17%جی ایس ٹی اور 4699روپے فی میٹرک ٹن پٹرولیم لیوی ادا کرنا ہوتی ہے، جبکہ درآمد شدہ ایل پی جی پر صرف 10فیصد جی ایس ٹی اور اسے پٹرولیم لیوی /ریگولیٹری ڈیوٹی سے مستثنیٰ حاصل ہے۔

(جاری ہے)

انہوں نے کہا کہ ایل پی جی دوردراز دیہاتوں میں رہنے والے قلیل آمدن والے لوگوں کا فیول ہے ،جہاں تک سوئی گیس دستیاب نہیں ہوتی اور وہ کھانا بنانے کیلئے لکڑیاں جلانے کی بجائے صاف فیول استعمال کرتے ہیں۔ انہوں نے کہا کہ پاکستان کی ایل پی جی کی 70فیصد ضروریات مقامی ریفائنریز اور گیس فیلڈز میں تیار کردہ ایل پی جی کے ذریعے پوری کی جاتی ہیںجبکہ بقیہ 30فیصد درآمدی ایل پی جی سے۔

مقامی ایل پی جی کی قیمت سعودی ارامکو کنٹریکٹ پرائس انڈیکس میں سب سے زیادہ ہے جبکہ پاکستان میں درآمد کی جانے والی زیادہ تر ایل پی سعودی ارامکو سی پی میں رعایتی قیمت پر دستیاب ہوتی ہے۔انہوں نے کہا کہ ایل پی جی کی درآمد پر سے جی ایس ٹی کم کرنے اور ریگولیٹری ڈیوٹی ختم کرنے سے وفاقی حکومت اس شعبے کی درآمدات کو 6ارب روپے کی بلاواسطہ سبسڈی دے رہی ہے،جبکہ اس کی جگہ اتنا ہی ملکی زر مبادلہ کمایا جا سکتا ہے۔

انہوں نے مزید کہا کہ درآمد شدہ سستی ایل پی جی سے مسابقت نہ رکھنے کے باعث کئی بار ایل پی جی کے مقامی پیداواری یونٹس کو کام کرنے سے روک دیا جاتا رہا ہے،جس سے نہ صرف ایل پی جی سے حاصل ہونے والے ریوینیو میں بلکہ قدرتی گیس اور مٹی کے تیل کا بھی نقصان ہوتا ہے کیونکہ یہ تینوں کی تیاری ایک ساتھ کی جاتی ہے۔ انہوں نے کہا کہ ہم سمجھتے ہیں کہ ملک میں ایل پی جی کی کمی کو پورا کرنے کیلئے ا سکی درآمد ناگزیر ہے مگر درآمد شدہ ایل پی جی کو مقامی ایل پی جی کی نسبت زیادہ سہولیات کی فراہمی غیر منصفانہ ہے۔

انہوں نے کہا کہ حکومت مقامی ایل پی جی پر پٹرولیم لیوی مزید بڑھانے پر غور کر رہی ہے، جس سے مقامی اور درآمدی ایل پی جی کی قیمتوں میں مزید فرق آجائے گا ، چونکہ ایل پی جی کی ملکی ضروریات 70فیصد مقامی سطح پر تیار ایل پی جی سے پوری کی جاتی ہیں تاہم قیمتوں میں اضافے کا بوجھ عام آدمی کو ہی اُٹھاناپڑے گا۔انہوں نے کہا کہ مقامی ایل پی جی انڈسٹری کے فروغ اور اس شعبے میں سرمایہ کاری کی حوصلہ افزائی کیلئے درآمدات کو سہولیات فراہم کرنے کی بجائے مقامی انڈسٹری کو مراعات دینا ہوں گی۔

تاہم انہوں نے حکومت سے اپیل کی ہے کہ ٹیکسز اور لیویز کے فرق کو ختم کیا جائے اور دونوں مقامی اور درآمد شدہ ایل پی جی پر یکساں ٹیکسز اور پٹرولیم لیوی/ریگولیٹری ڈیوٹی عائد کی جائے تاکہ صارفین کو کم قیمت ایل پی جی میسر آ سکے۔