اسلام آباد چیمبر آف کامرس کے صدر کا ایگزیکٹو باڈی کے اجلاس سے خطاب

اسلام آباد۔ (اُردو پوائنٹ اخبارتازہ ترین - اے پی پی۔ 26 اکتوبر2020ء): اسلام آباد چیمبر آف کامرس اینڈ انڈسٹری کے صدر سردار یاسر الیاس خان نے پنجاب حکومت کی طرف سے آر ڈی اے کے ذریعے راولپنڈی رنگ روڈ (آر تھری) منصوبہ شروع کرنے کے اقدام کو سراہا کیونکہ اس سے جڑواں شہروں سمیت خطہ پوٹھوہار میں ترقی کے ایک نئے دور کا آغاز ہوگا، آرتھری کے دونوں اطراف بزنس سنٹرز، صنعتی زونز، ٹرانسپورٹ ٹرمینلز، پھلوں اور سبزیوں کی ہول سیل مارکیٹ، لاجسٹک اینڈ ایجوکیشن سنٹرز، ہیلتھ سٹی، ڈرائی پورٹ، تفریحی پارک اور رہائشی علاقے تعمیر کئے جائیں گے جس سے خطے میں سرمایہ کاری اور صنعتکاری کو بہتر فروغ ملے گا، روزگار کے بہت سے نئے مواقع پیدا ہوں گے اور علاقے کی معیشت تیزی سے ترقی کرے گی، آر تھری منصوبے کی تکمیل سے نہ صرف جڑواں شہروں میں ٹریفک کا رش کم ہو گا، بلکہ صاف ستھرے اور صحتمند ماحول کو فروغ ملے گا۔

(جاری ہے)

ان خیالات کا اظہار انہوں نے اسلام آباد چیمبر آف کامرس اینڈ انڈسٹری کی ایگزیکٹو باڈی کے اجلاس سے خطاب کرتے ہوئے کیا۔سردار یاسر الیاس خان نے آر تھری کے ارد گرد بننے والے اسپیشل اکنامک زونز کی تیاری میں نجی شعبے کی مشاورت حاصل کرنے کے لئے ایک کمیٹی تشکیل دینے پر آر ڈی سے کے اقدام کو سراہا اور آئی سی سی آئی کے صدر کو اس کمیٹی کا ممبر بنا نے پر آر ڈی اے انتظامیہ کا شکریہ ادا کیا۔

انہوں نے کہا کہ کمیٹی کی تشکیل ایک بہت ہی مثبت پیشرفت ہے کیوں کہ اس سے نجی شعبے کی آرائ کی روشنی میں اور پبلک پرائیویٹ پارٹنرشپ کی بنیاد پر اسپیشل اکنامک زون قائم کرنے میں کافی سہولت ہو گی۔ انہوں نے کہا کہ جب نجی شعبے کے نمائندگان کی مشاورت سے اکنامک زونز تعمیر کئے جائیں گے تو یہ زونز سرمایہ کاروں کے تمام خدشات کو دور کریں گے اور موجودہ دور کی صنعتی ضروریات کو زیادہ موثر انداز میں پورا کریں گے۔

اس طرح یہ زونز علاقائی معیشت کو پائیدار ترقی کی راہ پر گامزن کرنے میں معاون ثابت ہوں گے۔ آئی سی سی آئی کے صدر نے کہا کہ آر ڈی اے کی تقلید کرتے ہوئے سی ڈی اے کو بھی چاہیے کہ وہ چیمبر کے وقتی صدر کو اپنے بورڈ میں شامل کرے تا کہ ادارے کی پالیسی سازی کے عمل کے دوران بزنس کمیونٹی کے مفادات کا بہتر تحفظ یقینی بنایا جائے۔ انہوں نے مزید کہا کہ سی ڈی اے اپنی اہم کمیٹیوں میں بھی آئی سی سی آئی کو نمائندگی دے جس سے نہ صرف بزنس کمیونٹی کے مسائل کو حل کرنے میں مدد ملے گی اور مشترکہ کوششوں سے مارکیٹوں، صنعتی علاقوں اور شہر کی بہتر ترقی کا حصول بھی ممکن ہو گا۔

آئی سی سی آئی کی سینئر نائب صدر فاطمہ عظیم، نائب صدر عبدالرحمٰن خان اور ایگزیکٹو باڈی کے ممبران نے صدر آئی سی سی آئی کو کمیٹی کا ممبر بنانے پر آر ڈی اے کے اقدام کو ایک دانشمندانہ فیصلہ قرار دیا کیونکہ اس سے آر تھری منصوبے پر بننے والے اسپیشل اکنامک زونز کی منصوبہ بندی کے عمل میں نجی شعبے کی آواز کو بہتر نمائندگی ملے گی۔ انہوں نے اس بات پر زور دیا کہ سی ڈی اے، ایف بی آر، واپڈا، سٹیٹ بینک اور کاروبار سے متعلقہ دیگر ادارے بھی آئی سی سی آئی کے وقتی صدر کو اپنے بورڈ میں شامل کریں جس سے تاجر برادری کے مسائل بہتر حل ہوں گے اورکاروبار کیلئے سازگارحالات پیدا کرنے کی طرف مثبت پیشرفت ہو گی۔

Your Thoughts and Comments