پاکستان اسٹیل، کاریگروں کی ریگولرائزیشن کیلئے یکساں پالیسی اختیار

ذیلی اداروں ایم ٹی سی اور پی ایس آئی ٹی میں بھرتیوں کی ابتدائی تاریخیں حتمی قرار

کراچی(اُردو پوائنٹ اخبارتازہ ترین - این این آئی۔ 23 فروری2021ء)پاکستان اسٹیل مل کی انتظامیہ نے میٹالرجیکل ٹریننگ سینٹر (ایم ٹی سی)اور پاکستان اسٹیل انسٹی ٹیوٹ آف ٹیکنالوجی(پی ایس آئی ٹی)میں کام کرنے والے کاریگروں کی ریگولرائزیشن اور شمولیت کے حوالے سے یکساں پالیسی اختیار کرنے کیلئے ان کی بھرتیوں کی ابتدائی تاریخوں کو ہی حتمی تاریخ قرار دینے کا سرکلر جاری کردیا ہے ۔

(جاری ہے)

اسٹیل مل کے ایڈمن و پرسنل ڈپارٹمنٹ سے جاری ہونے والے سرکلر میں کہا گیا ہے کہ یہ اقدام ایم ٹی سی اور پی ایس آئی ٹی میں کام کرنے والے کاریگروں کی ریگولرائزیشن اور شمولیت کے حوالے سے ابہام دور کرنے کیلئے کیا گیا ہے ،دونوں اداروں میں کام کرنے والے کاریگر مختلف ادوار اور مدت میں بھرتی ہوئے اور اس حوالے سے ان کی ریگولرائزیشن کے سلسلے میں بے پناہ تکنیکی رکاوٹوں کا سامنا تھا ،سرکلر کے مطابق ابہام دور کرنے کیلئے ان دونوں اداروں میں کام کرنے والے کاریگروں کی بھرتی کی تاریخ ان کی ابتدائی بھرتی کی تاریخوں کو ہی تصور کیا جائیگا تا کہ یکساں پالیسی کے تحت دونوں اداروں کے کاریگروں کے ریگولرائزیشن کے معاملات کو نمٹایا جاسکے ۔