ملکی فضا سازگار ہونے کے باعث پاکستان میں معاشی و اقتصادی استحکام آرہاہے،ترجمان ٹریڈ ڈویلپمنٹ اتھارٹی

ملکی فضا سازگار ہونے کے باعث پاکستان میں معاشی و اقتصادی استحکام آرہاہے،ترجمان ..
فیصل آباد (اُردو پوائنٹ اخبارتازہ ترین - اے پی پی۔ 23 فروری2021ء) ملکی فضا سازگار ہونے کے باعث پاکستان میں معاشی و اقتصادی استحکام آرہاہے جس کی وجہ سے دنیابھر کے مختلف ممالک سے سرمایہ کار اب پاکستان کارخ کررہے ہیں اسی لئے حکومت نے نئے برآمد کنندگان کی استعدادکار بڑھانے کیلئے ٹریڈ ڈویلپمنٹ اتھارٹی کو نیامنصوبہ شروع کرنے کی ہدایت کی ہے تاکہ ملکی برآمدات کے ضمن میں مقررکردہ اہداف کی تکمیل کے ذریعے قیمتی زرمبادلہ کا حصول ممکن بناکر نہ صرف پاکستان کو معاشی استحکام سے ہمکنار کیاجاسکے بلکہ وسیع سرمایہ کاری ممکن بنانے میں بھی مدد مل سکے۔

ٹریڈ ڈویلپمنٹ اتھارٹی کے ترجمان نے بتایاکہ حکومت کی جانب سے رواں مالی سال 2021-21 کے آغاز پر برآمد کنندگان کیلئے بعض مراعات کااعلان کیا گیا تھا جس کے بعد سمال اینڈ میڈیم انٹرپرائزز کو ایکسپورٹ نیٹ ورک میں لانے کیلئے بھی اقدامات کئے جارہے ہیں۔

(جاری ہے)

انہوں نے کہاکہ چین پاکستان اقتصادی راہداری کی وجہ سے تمام دنیا کے سرمایہ کار اب پاکستان کارخ کررہے ہیں۔

انہوں نے بتایاکہ ملک میں توانائی کی کمی پر قابوپانے کیلئے نئے منصوبوں کے آغاز، میگا پراجیکٹس کی تکمیل، انفراسٹرکچر، انڈسٹریل سیکٹر اور مینوفیکچرنگ کے شعبوں میں بھی حوصلہ افزا طریقے سے بیرونی سرمایہ کاری آرہی ہے۔ انہوں نے کہاکہ اتھارٹی نہ صرف بیرونی سرمایہ کاری کو فروغ دے گی بلکہ ملکی سرمایہ کاروں کو بھی تمام ممکن سہولیات کی فراہمی کو یقینی بنایاجائیگا۔

Your Thoughts and Comments