ملک میں کاٹن کی کمی ہے نہ بھارت سے درآمد کرنے کی کوئی تجویز دی گئی، اپٹما

کراچی(اُردو پوائنٹ اخبارتازہ ترین - آن لائن۔ 24 فروری2021ء) آل پاکستان ٹیکسٹائل ملز ایسوسی ایشن (اپٹما) کے سینیئر نائب صدر زاہد مظہر نے پاکستان ہوزری مینوفیکچررز ایسوسی ایشن (پی ایچ ایم ای) اور پاکستان ٹیکسٹائل ایکسپورٹرز ایسوسی ایشن (پی ٹی ای ای) کی جانب سے میڈیا میں چلنے والے ان بیانات کو سختی سے مسترد کیا ہے جن میں ملک میں کاٹن یارن کی کمی کا ذکر کیا گیا ہے اور اس کی بنیاد پر ہندوستان سے اس کی درآمد کی تجویز دی گئی ہے۔

پی ایچ ایم اے اور پی ٹی ای اے کے بیانات پر رد عمل دیتے ہوئے زاہد مظہر نے کہا ان کے بیانات حقائق پر مبنی نہیں ہیں اور وہ ان بیانات کے ذریعے حکومت اور متعلقہ حکام کو گمراہ کر رہے ہیں کیونکہ ملک میں اس وقت کاٹن کی کوئی کمی نہیں ہے۔ادارہ شماریات پاکستان کے اعداد و شمار کا حوالہ دیتے ہوئے انہوں نے کہا کہ جولائی 2020 سے جولائی 2020 تک ملک میں کاٹن یارن کی مجموعی پیداوار 1715665 ٹن تھی جو گزشتہ برس کے اس عرصے میں 1714715 ٹن تھی۔

(جاری ہے)

انہوں نے کہا یارن کی اس مجموعی پیداوار میں سے صرف دس فیصد اس مالی سال کی پہلی ششماہی میں برآمد کی گئی جب کہ نوے فیصد ملکی صنعت کے لیے دستیاب تھی ، اس میں سے مقامی صنعت سے ستر فیصد یارن استعمال کر لیا ہے جب کہ ابھی بھی بیس فیصد فاضل یارن موجود ہے، اسی طرح برآمد کنند گان کو ڈی ٹی آر ای، ای او یو اور مینوفیکچرنگ بانڈ اسکیم کے تحت ڈیوٹی فری کاٹن یارن کی درآمد کی اجازت بھی ہے، اگر ان کے خیال میں مقامی کاٹن یارن مہنگی ہے۔

زاہد مظہر نے نشاندہی کی کہ اصل مسئلہ کپاس کی فصل کی سکڑتی پیداوار ہے جس کی پیداوار میں گزشتہ چند سالوں میں بہت زیادہ کمی دیکھنے میں آئی ہے۔ اس سیزن میں کاٹن کی کی 55 لاکھ گانٹھوں کی پیداوار کا تخمینہ ہے جو جو تاریخی طور پر اس کی بدترین پیداوار ہے۔ پاکستان میں کاٹن کی ڈیڑھ کروڑ گانٹھوں کی سالانہ کھپت ہوتی ہے اور سب سے زیادہ آج تک ایک کروڑ پینتالیس لاکھ گانٹھوں کی پیداوار حاصل کی جا سکی ہے۔

زاہد مظہر نے کہا کہ یارن استعمال کرنے والے شعبے کو دھاگہ بنانے والی صنعت کی جانب سے اپنی لاگت سے کم نرخ پر یارن کی فراہمی کی توقع نہیں رکھنی چاہیے بلکہ انہیں نئے مواقع ڈھونڈ کر اپنے منافع کو بڑھانے کے لیے کام کرنا چاہیے۔ انہوں نے ان الزامات کی سختی سے تردید کی کہ یارن کی ذخیرہ اندوزی یا اسے زیادہ قیمت پر بیچا جا رہا ہے۔ زاہد مظہر نے کہا کہ ہندوستان سے کاٹن یارن کی درآمد سے ایک جانب پاکستان کی دھاگہ بنانے والی صنعت بحران کا شکار ہو گی جس کا نتیجہ فیکٹریوں کی بندش میں نکلے گا تو دوسری جانب یہ ہندوستان کی معیشت اور اس کی دھاگہ بنانے والی صنعت کو مضبوط کرے گا