ہر شخص کو اپنی معاشرتی ذمہ داری سنجیدگی سے نبھانی ہوگی، ایاز میمن

ہر شخص کو اپنی معاشرتی ذمہ داری سنجیدگی سے نبھانی ہوگی، ایاز میمن
کراچی (اُردو پوائنٹ اخبارتازہ ترین - این این آئی۔ 06 اپریل2021ء)کراچی تاجرالائنس ایسوسی ایشن کے چیئرمین ایاز میمن موتی والا نے سندھ حکومت کے دو دن کاروبار بند کرنے کے فیصلے کا خیرمقدم کرتے ہوئے کہا ہے کہ کرونا وائرس کے پھیلائو کو روکنے کے لیئے رش کم کرنے کی ضرورت ہے اور اگر بروقت اہم فیصلے نہ کیے گئے تو معاشی سرگرمیوں کو مکمل طور پر بند کرنا پڑ سکتا ہے جو کہ زیادہ مشکل فیصلہ اور معاملہ ہے، اگر ہفتے میں دو دن مارکیٹیں بند رہتی ہیں تو باقی کے پانچ دن احتیاطی تدابیر کے ساتھ کاروبار کیا جاسکتا ہے جس سے معاشی مسائل بھی نہیں ہوں گے اور کرونا کے پھیلائو کو بھی روکنے میں مدد ملے گی، ان خیالات کا اظہارا نہوں نے اپنی رہائش گاہ سے جاری کردہ بیان میں کیا، ایاز میمن موتی والا نے کہا کہ کرونا وائرس کے کیسز میں ہونے والا اضافہ تشویشناک ہے اس وقت ہمیں ایک باشعور اور سنجیدہ قوم ہونے کا مظاہر ہ کرنا پڑیگا کرونا وائرس ایک ایسی وبا ہے جس کا واحد حل بچائو ہے لوگوں سے ملنا ملانا کم کردیں اور سماجی فاصلہ برقرار رکھیں ، ماسک کا استعمال کریں اور بلاضرورت گھروں سے نہ نکلیں اور نہ ہی رش والی جگہوں پر جائیں ، انہوں نے کہا کہ اس وقت سندھ میں کرونا وائرس کے کیسز دیگر صوبوں کی نسبت کم ہیں اور سندھ حکومت کا کرونا کو روکنے کے لیئے کیے جانے والے اقدامات اور احتیاطی تدابیر پر عمل درآمد بہت ضروری ہے ، کراچی کی عوام کو زیادہ احتیاط کی ضرورت ہے کیونکہ کرونا کے ساتھ ساتھ ہیٹ اسٹروک بھی ہے اور شدید گرمی کے اس موسم میں لوگ گھروں سے بلا ضرورت نہ نکلیں، اس وقت قومی اتحاد کی ضرورت ہے اور ہم سب کو ملکر اس مشکل صورتحال سے نمٹنا ہے ، میری عوام سے اپیل ہے کہ وہ اپنے گھروں میں رہیں اور بلاوجہ نہ خود باہر نکلیں اور نہ ہی بچوں کو جانے دیں کیونکہ کرونا وائرس چھوٹے بچوں کو بھی بہت تیزی سے اپنی لپیٹ میں لے رہا ہے ، انہوں نے مزید کہا کہ کرونا وائرس کی پھیلائو کوروکنے کے لیئے سندھ حکومت کے ساتھ کھڑے ہیں اور اپنی حیثیت کے مطابق مدد کرنے کو بھی تیار ہیں ، کرونا وائرس کی یہ لہر زیادہ خطرناک ہے اور ہمیں اس میں زیادہ احتیاط کی بھی ضرورت ہے اس لئے ہر شخص اپنی اپنی معاشی ذمہ داری کو سمجھے اور اس کو احسن طریقے سے نبھانے کی کوشش کرے۔

Your Thoughts and Comments