کراچی:سپر ہائی وے پر سبزی منڈی کی منتقلی کو 20برس مکمل

کراچی (اُردو پوائنٹ اخبارتازہ ترین - آن لائن۔ 16 اپریل2021ء) سپر ہائی وے پر سبزی منڈی کی منتقلی کو 20برس مکمل ہوگئے ،تاہم ان دو عشروںمیں سبزی منڈی کے تاجروںکے مسائل حل نہ کئے جاسکے ۔تفصیلات کے مطابق 16اپریل 2001کو کراچی کی سبزی منڈی کو حسن اسکوائر کے مقام سے سپر ہائیوے پر منتقل کیا گیا تھا اور سبزی منڈی کی منتقلی کے دوران دوکانداروں اور تاجروں کو یقین دہانی کرائی گئی تھی کہ نئی سبزی منڈی میں پانی،بجلی،گیس،سڑکیں،سیوریج اور دیگر تمام انفرا اسٹریکچر اور مکمل سہولیات فراہم کی جائیں گی ،تاہم بدقسمتی اور مارکیٹ کمیٹی و دیگر متعلقہ حکام کی مجرمانہ غفلت،مبینہ کرپشن اور لوٹ کھسوٹ کے بازار کے باعث سبزی منڈی میںاس وقت پانی کی صورتحال انتہائی ابتر ہے اور تاجروں کو مہنگے داموں ٹینکرز کے ذریعے پانی خریدنا پڑتا ہے ،سبزی منڈی کے تمام بلاکس کو ان 20برسوںمیں بجلی کی فراہمی بھی یقینی نہ بنائی جاسکی جبکہ متعدد دکانوں پر بجلی کے میٹرز ہی نصب نہیںاور یہاں پرچیوں سے لکھ کر بجلی کے بل وصول کرنے کا رواج ہے ،سبزی منڈی میںنکاسی آب کی صورتحال بھی انتہائی خراب ہے اور بارش کے سیزن میں سبزی منڈی گندے تالاب اور جوہڑ کا منظر پیش کرتی ہے ۔

(جاری ہے)

سبزی منڈی میںانفرا اسٹریکچر کے مسائل کے ساتھ ساتھ لیزنگ،الاٹمنٹ،ٹرانسفر اور خرید و فروخت کے بھی مسائل موجود ہیں اور دو عشروں کے دوران بھی نہ تو سبزی منڈی کو لیز کیا جاسکا جبکہ دکانوں کی منتقلی کا عمل بھی منجمند ہے۔سبزی منڈی کے ماسٹر پلان میں4135دکانیں ہیں،تاہم اس وقت یہاں دکانوں کی تعداد 6500سے زائد ہے جبکہ 10ہزار سے زائد فائلیں مبینہ طور پر موجود ہیں،سبزی منڈی میں لیز اور منتقلی کے عمل کی بحالی کے بجائے قبضوں اور ناجائز تعمیرات عروج پر ہیں اور مارکیٹ کمیٹی کے متعدد عہدیداران کرپشن کیس میں ملوث رہے ہیں،مارکیٹ کمیٹی کے سابق چیئرمین عبدالحکیم بلوچ کے دور میں سبزی منڈی کی لیز سے متعلق نوٹیفکیشن جاری ہوا تھا جس پر عملدر آمد نہ ہوسکا۔

سبزی منڈی کے تاجروں کا اس ضمن میں کہنا ہے کہ سبزی منڈی میں ترقیاقی کاموں کے ساتھ ساتھ دستاویزی عمل بھی مکمل طور پر ٹھپ ہے ،بیس برسوں میں بھی سبزی منڈی کو لیز نہ کرایا جاسکا جبکہ دکانوں کی منتقلی کا عمل بھی جمود کا شکار ہے ،سبزی منڈی کی لیزنگ اور دکانوں کی منتقلی کے عمل کو بحال کرکے قیمتی ریونیو حاصل کیا جاسکتا ہے جسے سبزی منڈی کی حالت سدھارنے پر خرچ ہوسکتا ہے ،انہوں نے مزید کہا کہ سبزی منڈی سے متعلق محستب اعلیٰ کے فیصلوں پر عملدر آمد ہوجاتا تو آج سبزی منڈی کی حالت بہت بہتر ہوتی،مگر بدقسمتی سے سبزی منڈی میں اختیارات کو خدمت کے بجائے مال بنانے کیلئے استعمال کیا گیا ۔