لاہور چیمبر آف کامرس اینڈ انڈسٹری کا جہانگیر بدر انسٹی ٹیوٹ آف ویژن اینڈ لیڈرشپ کے ساتھ ایک مفاہمتی یادداشت پردستخط

لاہور (اُردو پوائنٹ اخبارتازہ ترین - آن لائن۔ 23 اپریل2021ء) لاہور چیمبر آف کامرس اینڈ انڈسٹری نے جہانگیر بدر انسٹی ٹیوٹ آف ویژن اینڈ لیڈرشپ کے ساتھ ایک مفاہمتی یادداشت پردستخط کیے ہیںجس کا مقصد ملک کی تجارت، صنعت اور معاشی ترقی کے فروغ کے لئے مل کر کام کرنا ہے۔ صدر لاہور چیمبر آف کامرس اینڈ انڈسٹری میاں طارق مصباح اور چیئرمین جہانگیر بدر انسٹی ٹیوٹ آف وژن اینڈ لیڈرشپ ذوالفقار علی بدر نے مفاہمتی یادداشت پر دستخط کیے۔

اس معاہدے کے تحت دونوں ادارے نوجوانوں، کاروباری افراد، سیاسی رہنماؤں، سرکاری عہدیداروں، منیجرز، کمپنی ڈائریکٹرز اور سفارتی عملہ وغیرہ کے لئے مشترکہ تربیتی اور ترقیاتی پروگراموں کا اہتمام کریں گے، اس کے ساتھ ساتھ دونوں تنظیمیںکاروباری، معاشرتی، معاشی، سیاسی اور بین الاقوامی تعلقات کے امورپر ریسرچ بھی کریںگے۔

(جاری ہے)

اس موقع پر لاہور چیمبر کے صدر میاں طارق مصباح نے کہا کہ لاہور چیمبر آف کامرس اینڈ انڈسٹری پہلے ہی مختلف چیمبرز آف کامرس اینڈ انڈسٹری، سرکاری، نجی اور تعلیمی اداروں کے ساتھ مفاہمت کی یادداشت پر دستخط کر چکا ہے۔

انہوں نے کہا کہ لاہور چیمبر اور جے بی آئی وی ایل کے مابین یہ معاہدہ تجارت، صنعت اور سرکاری و نجی اداروں کو ساتھ لانے کے لئے ایک اہم اقدام ہے۔ انہوں نے کہا کہ ملک کو درپیش معاشی چیلنجوں کے لئے قابل عمل حل کی اشد ضرورت ہے اور یہ صرف صنعت اور اداروں کے مابین مضبوط روابط کے ذریعے ہی ممکن ہے۔ انہوں نے کہا کہ پاکستان میں وسائل کی کوئی کمی نہیں ہے لیکن ہم معاشی دوڑ میںاب بھی پیچھے ہیں کیونکہ ہم ان وسائل سے بھرپور استفادہ کرنے میں ناکام رہے ہیں۔

میاں طارق مصباح نے کہا کہ ترقی یافتہ معیشتوں میںان کے اداروں کے مابین مضبوط روابط ہیں اور پاکستان کو بھی اپنے متعدد امور پر قابو پانے کے لئے اس طرز کو اپنانے کی ضرورت ہے۔ انہوں نے امید ظاہر کی کہ جہانگیر بدر انسٹی ٹیوٹ آف وژن اینڈ لیڈرشپ معیشت اور بین الاقوامی امور سے متعلقہ شعبوں میں تاجروں کو تربیت کے ذریعے لیڈرشپ کے خلا کو ختم کرنے میں بڑی مدد فراہم کرے گا۔

صدر لاہور چیمبر نے کہا کہ دونوں اداروں کے مابین اس معاہدے سے تجارت، صنعت اور معیشت کو درپیش مسائل کے نئے حل تلاش کرنے میں مدد ملے گی۔اس کے علاوہ صدر لاہور چیمبرنے جاری معاشی چیلنجوں پر بھی روشنی ڈالی اور ملک کو ان مسائل سے نکالنے کے لئے اجتماعی نقطہ نظر کی ضرورت پر زور دیا۔ انہوں نے کہا کہ لاہور چیمبر آف کامرس اینڈ انڈسٹری اور جے بی آئی وی ایل دونوں اپنی منفرد طاقت رکھتے ہے اور دونوں اداروں کے ہاتھ ملانے سے معاشی محاذ پر مثبت تبدیلی آئے گی۔

لاہور چیمبر کے نائب صدر طاہر منظور چودھری نے کہا کہ صنعت و تجارت اور معیشت کے مفادات کے لیے مشترکہ کوششیں کرنا وقت کی اہم ضرورت ہے۔ انہوں نے کہا کہ پاکستان صرف کاروباری معاملات میں جدت کی کمی اور اس بارے میں آگاہی نہ ہونے کی وجہ سے بین الاقوامی سطح پر اپنا اثر نہیں ڈال سکتا۔ چیئرمین جہانگیر بدر انسٹی ٹیوٹ آف وژن اینڈ لیڈرشپ ذوالفقار علی بدر نے امید ظاہر کی کہ دونوں اداروں کے درمیان یہ معاہدہ خوش آئند ثابت ہو گا اور دونوں ادارے اپنے مطلوبہ اہداف حاصل کرلے گا۔