فریٹ فارورڈرز کو ٹیکس آڈٹ سے پانچ سال کیلئے استثنیٰ اور ٹرن اوور ٹیکس کم کیا جائے‘خواجہ شاہ زیب اکرم

ٹیکسوں کی شرح بہت زیادہ ہونے کی وجہ سے لاکھوں فریٹ ممبران کا مستقبل خطرے میں ہے‘سینئر نائب صدرایف پی سی سی آئی

جمعہ 7 مئی 2021 23:27

لاہور(اُردو پوائنٹ اخبارتازہ ترین - این این آئی۔ 07 مئی2021ء) فیڈریشن آف پاکستان چیمبرز آف کامرس اینڈ انڈسٹری کے سینئر نائب صدر خواجہ شاہ زیب اکرم نے کہا ہے کہ فریٹ فارورڈرز کو ٹیکس آڈٹ سے پانچ سال کیلئے استثنیٰ اور ٹرن اوور ٹیکس کم کیا جائے،حکومت فریٹ فارورڈرز کوپہلے سے دی گئی ٹیکس چھوٹ کو ختم نہ کریں۔ ان خیالات کا اظہار فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے سینئر نائب صدر خواجہ شاہ زیب اکرم نے پاکستان انٹر نیشنل فریٹ فاروڈرز ایسوسی ایشن کے وفد سے ایف پی سی سی آئی ریجنل آفس لاہور میں ملاقات کے موقع پر کیا۔

انہوں نے پاکستان انٹر نیشنل فریٹ فاروڈرز ایسوسی ایشن کے عہدہدارن کو مسائل کے حل کے لیے مکمل تعاون کی یقین دہانی کروائی اور کہاکہ ایف پی سی سی آئی فریٹ فاروڈرز کے مسائل کے حل کے لیے ہر فورم پر آواز اٹھائے گی۔

(جاری ہے)

پاکستان انٹر نیشنل فریٹ فاروڈرز ایسوسی ایشن کے چیئرمین محمد الیاس اور سابق چیئرمینز محمد جمیل اور توقیر ملک نے کہاکہ کرونا وباؤ سے فریٹ فاروڈرز کے کاروبار کو بہت زیادہ نقصان کا سامنا ہے ،فریٹ فارورڈرز کو ٹیکس آڈٹ سے پانچ سال کیلئے استثنیٰ اور ٹرن اوور ٹیکس کم کیا جائے۔

انہوں نے مزید کہاکہ ایف بی آر سروسز کی بجائے پوری انوائس پر تین فیصد ٹرن اوور ٹیکس وصول کر رہا ہے ،فریٹ فرورڈز سے ٹرن اوور گراس انوائس پر نہیںبلکہ ان کی سروسز پر ہونا چاہیے تاکہ کرونا وبا سے مشکلات کا شکار ہونے والا فریٹ فاروڈینگ کا شعبہ دوبارہ اپنے پاؤں پر کھڑا ہو سکے۔ انہوں نے مزید کہاکہ حکومت موجودہ مشکل حالات میں ٹیکس ریلیف دینے کی بجائے پہلے سے دی گئی ٹیکس چھوٹ کو ختم بھی ختم کر رہی ہے جو ٹیکس دینے والوں کے ساتھ نا انصافی ہے۔ انہوں نے کہاکہ ٹیکسوں کی شرح بہت زیادہ ہونے کی وجہ سے لاکھوں فریٹ ممبران کا مستقبل خطرے میں ہے۔