لاہورچیمبر کی جانب سے پولیس کو کروناسے بچائو کے لیے اشیا کا مزید عطیہ

لاہورچیمبر کی جانب سے پولیس کو کروناسے بچائو کے لیے اشیا کا مزید عطیہ
لاہور (اُردو پوائنٹ اخبارتازہ ترین - آن لائن۔ 08 مئی2021ء) لاہور چیمبر آف کامرس اینڈ انڈسٹری نے محکمہ پولیس کو کرونا سے بچائو کے لیے حفاظتی اشیاء کا ایک اور عطیہ دیا ہے تاکہ وہ اس وبا کو پھیلنے سے روکنے کے لیے مزید بہتر خدمات سرانجام دے سکیں۔ لاہور چیمبر کے صدر میاں طارق مصباح نے نائب صدر طاہر منظور چودھری کے ہمراہ اشیاء کا عطیہ ایس پی انویسٹی گیشن کینٹ محمد نوید ارشاد کے حوالے کیا۔

میاں طارق مصباح اور طاہر منظور چودھری نے کہا کہ پولیس کے جوان فرنٹ لائن فورس ہیں اور کرونا کا پھیلائو روکنے، ایس او پیز پر عمل درآمد کرنے کے لیے بھرپور محنت کررہے ہیں۔ انہوں نے کہا کہ لاہور چیمبر آف کامرس اینڈ انڈسٹری پہلے بھی کرونا سے بچائو کے لیے اشیاء و آلات کے عطیات سی سی پی او اور ڈی آئی جی آپریشن کے حوالے کرچکا ہے۔

(جاری ہے)

انہوں نے کہا کہ لاہور چیمبر کرونا کی وباء سے نمٹنے کے لیے اپنا بہترین کردار ادا کرتا رہے گا۔

انہوں نے کہا کہ کرونا نے پہلے ہی تجارت و معیشت کو بھاری نقصان پہنچایا ہے جبکہ ہزاروں قیمتی جانیں بھی ضائع ہوچکی ہیں، اس کا مزید پھیلائو روکنے کے لیے ہر ایک کو اپنا بھرپور کردار ادا کرنا ہوگا۔ ایس پی انویسٹی گیشن کینٹ محمد نوید ارشاد نے کہا کہ کرونا کی وباکو آسان نہ لیا جائے، ایس او پیز پر بھرپور عمل درآمد کیا جائے تاکہ مزید تباہی رونما نہ ہو۔ لاہور چیمبر کے سابق نائب صدر ذیشان خلیل، ایگزیکٹو کمیٹی اراکین شیخ سجاد افضل اور علی افضل بھی اس موقع پر موجود تھے۔

Your Thoughts and Comments