پٹرولیم مصنوعات کی قیمتوں میں اضافہ بزنس کمیونٹی اور عوام کی پریشانی بڑھا دے گا‘فائونڈرزگروپ

حکومت بزنس کمیونٹی اور عام آدمی پر بم گرانے کی بجائے اپنے شاہانہ اخراجات میں کمی کرنی چاہیے‘میاں اشرف، شیخ آصف، خواجہ خاور رشید

لاہور(اُردو پوائنٹ اخبارتازہ ترین - این این آئی۔ 31 جولائی2021ء)پٹرولیم مصنوعات کی قیمتوں میں ایک بار پھر اضافہ بزنس کمیونٹی کی پریشانی کو اور بڑھادے گاجبکہ اس سے عام آدمی بھی حددرجہ متاثر ہوگا،بزنس کمیونٹی اور عام آدمی پر بم گرانے کی بجائے حکومت کو اپنے شاہانہ اخراجات میں کمی کرنی چاہیے ۔

(جاری ہے)

فائونڈرز گروپ کے لیڈرز میاں محمد اشرف، شیخ محمد آصف، فاروق افتخاراور پنجاب ڈائیز اینڈ کیمیکلز مرچنٹس ایسوسی ایشن کے لاہور چیپٹر کے صدر ،لاہور چیمبر آف کامرس اینڈ انڈسٹری کے سابق سینئر نائب صدر خواجہ خاور رشید نے اپنے مشترکہ بیان میں کاہ کہ حکومت مسلسل قیمتیں بڑھاتی چلی جارہی ہے تاکہ اپنے اخراجات پورے کرسکے لیکن اس سے ٹریڈ اور انڈسٹری کو کیا نقصان ہوگا اس کی کسی کو فکر نہیں ۔

اب ایک بار پھر پٹرول کی قیمت میں بھاری اضافہ کردیا گیا ہے۔ انہوں نے کہا ہے کہ پندرہ جون کو پٹرول کی قیمت میں 2.13روپے، تیس جون کو دو روپے اور پندرہ جولائی کو 5.40روپے فی لٹر اضافہ کیا گیا ہے جو ظلم ہے۔ انہوں نے کہا ہے کہ حکومت آئندہ پٹرولیم مصنوعات کی قیمتوں میں اضافہ سے گریز کرے اورحالیہ اضافہ بھی واپس لے کیونکہ اس سے ٹریڈاور انڈسٹری کے ساتھ ساتھ ایگریکلچر سیکٹر بھی متاثر ہوجائے گا۔

Your Thoughts and Comments