ڈاکٹر نعمان بٹ ایف پی سی سی آئی الیکشن میں یو بی جی کے صدارتی امیدوار نامزد

حنیف گوہر سینئرنائب صدر کے امیدوار ہونگے،فیڈریشن چیمبر کوموجودہ گروپ نے کنگال کردیا ،ایس ایم منیر طارق پولانی،کمیل پولانی اور انکی فیملی کی جانب سے دیئے گئے عشائیے میں زبیرطفیل،عبدالرحیم جانو کا خطاب

ڈاکٹر نعمان بٹ ایف پی سی سی آئی الیکشن میں یو بی جی کے صدارتی امیدوار ..
کراچی (اُردو پوائنٹ اخبارتازہ ترین - این این آئی۔ 25 ستمبر2021ء)یونائٹیڈ بزنس گروپ(یو بی جی)نے سال2022کیلئے پنجاب کے کوٹے پر سیالکوٹ کے بزنس مین ڈاکٹر نعمان ادریس بٹ کو صدارتی امیدوار نامزد کردیا ہے اور یہ فیصلہ یو بی جی پنجاب کی کورکمیٹی کے سربراہ میاں محمدادریس کی زیرصدارت ہونے والے اجلاس میں کیا گیا۔ایف پی سی سی آئی کے آئندہ انتخابات میںیو بی جی نے سینئر نائب صدر کے عہدے کیلئے محمدحنیف گوہر کو امیدوار نامزد کیا گیا ہے۔

مذکورہ امیدواروں کی حتمی منظوری 28ستمبر کو لاہور میں ہونے والے مرکزی کورکمیٹی کی اجلاس میں کی جائے گی جس کی صدارت یو بی جی کے صدر زبیرطفیل کریں گے جبکہ چیئرمین افتخار علی ملک ان فیصلوں کی توثیق کرینگے،کورکمیٹی کے اجلاس میں یو بی جی کے سرپرست اعلیٰ ایس ایم منیر طبیعت ناسازی کے باعث شرکت نہیں کرسکیں گے۔

(جاری ہے)

دوسری جانب یو بی جی کے سربراہ ایس ایم منیر نے دوسال کے دوران بزنس مین پینل کے لوگوں نے ایف پی سی سی آئی کوتباہ کردیا ہے جبکہ یو بی جی نے پانچ سال کے دوران نہ صرف مالی معاملات بہتر بنائے بلکہ فیڈریشن کے خزانے میں16کروڑ روپے چھوڑے جسے اب کنگال بنادیا گیا ہے۔

انہوں نے ان خیالات کا اظہار گزشتہ شب پولانی ٹریول کے طارق پولانی،کمیل پولانی ،سعد پولانی،شایان پولانی،خضرپولانی کی جانب سے دیئے گئے عشائیہ سے خطاب کے دوران کیا ۔تقریب سے یو بی جی کے صدر زبیرطفیل،کمیل پولانی،عبدالرحیم جانو نے بھی خطاب کیا جبکہ معروف بزنس مین بشیرعلی محمد،عارف حبیب،عقیل کریم ڈھیڈھی،سی پی ایل سی کے چیف زبیرحبیب، مولانا بشیرفاروقی،جاپان کے قونصل جنرل توشی کاذاایسومورا،احمدچنائے،سمیرمیرشیخ،فرحان چشتی،معروف بینکر ،صدر بینک الفلاح عاطف باجوہ، خرم شیرزمان،حاجی رفیق پردیسی،افضل چامڑیا،رفیق سلیمان اور جرمنی،انڈونیشیا کے سفارتکار بھی موجود تھے۔

ایس ایم منیر نے کہا کہ ملک میں مہنگائی بہت بڑھ رہی ہے جسے روکنے کیلئے حکومت کو فوری اقدامات کرنے ہونگے،چھوٹا تاجر اس وقت شدید پریشانیوں سے دوچار ہے،پیٹرول،گھی،آٹا،چینی،دالیں اور تمام ضروری اشیاء کی قیمتیں بڑھ چکی ہیں، مہنگائی کو رکوانے میں ایف پی سی سی آئی کی موجودہ قیادت ناکام ہوچکی ہے۔انہوں نے کہا کہ ہندوستان میںم مسلمانوں کو قتل کیا جارہا ہے اور ہم خدا کا شکر ادا کرتے ہیں کہ آزاد فضاء میں سانس لے رہے ہیں اور یہ اطمینان ہمیں پاک فوج کے جوانوں کی جدوجہد اور قربانیوں کی وجہ سے ملا ہے ورنہ ہم بھی آج اپنے گھروں میں دبکے بیٹھے ہوتے ،ہم اپنے آرمی چیف کو سلام پیش کرتے ہیں ۔

زبیرطفیل نے کہا کہ ایف پی سی سی آئی کے اقتدار پر دھاندلی سے قابض ہونے والے اب اپنے گھروں کو جانے کی تیاریاں لرلیں،یو بی جی نے پاکستان بھر میں فیڈریشن کے انتخابات کیلئے سرگرمیاں شروع کردی ہیں صدر ،سینئرنائب صدر کیلئے امیدوار نامزد کردیئے ہیں،اس بارمخالف گروپ دھاندلی نہیں کرسکے گا۔عبدالرحیم جانو نے کہا کہ بابا فرید فری آئی کیمپ کے ذریعہ ہم نے نابیان پن کے خاتمے کیلئے جو جہاد شروع کیا تھا اس میں انسانیت کا درد رکھنے والے بھرپور ساتھ دے رہے ہیں۔

Your Thoughts and Comments