چترال کی سیاحت کے فروغ کے لئے اسلام آبا د میں سہ روزہ ورکشاپ کا انعقاد کیا جا ئے گا ، ایف پی سی سی آئی

پیر 24 جنوری 2022 17:09

پشاور(اردو پوائنٹ تازہ ترین اخبار ۔ 24 جنوری 2022ء) فیڈریشن آ ف پاکستان چیمبرزآ ف کامرس اینڈ انڈسٹری(ایف پی سی سی آئی) اور چترال ہیلپنگ گروپ (سی ایچ جی ) چترال میں سیاحت کے فروغ کے لئے اسلام آبادمیں فروری کے آخری ہفتے میں سہ روزہ ورکشاپ منعقد کرائے گا ۔ اس بات کا فیصلہ پیر کو رکن صوبائی اسمبلی مولانا ہدایت الرحمان کی قیادت میں چترال کے وفدکی سارک چیمبر کے نائب صدر حاجی غلام علی اور ایف پی سی سی آئی خیبرپختونخوا کے کوآرڈینیٹرسرتاج احمد خان کے ساتھ منعقد ہ اجلاس میں کیاگیا ،چترالی وفد میں خطیب شاہی مسجد چترال مولانا خلیق الزمان ، سینئر صحافی ذوالفقارعلی شاہ، قشقار تنظیم کے سربراہ محمد علی مجاہد، سوشل ایکٹویسٹ محمد بنی معاویہ ، ادیب ظفراللہ پروازاور ادیب جہا نداد شاہ پر مشتمل تھا۔

(جاری ہے)

حاجی غلام علی نے کہا کہ قدرت نے چترال کو بے مثال خوبصورتی سے نوازا ہے، چترال میں سیاحت کے لئے دل کش مقامات، صحت بخش آب وہوا سمیت خوبصورت پہاڑ، دریا ، آبشار، گلیشئر اور کالاش ویلی کی تاریخی داستان موجود ہیں جن کو دنیا کے سامنے لانا ہے تاکہ سیاح اس خوبصورت وادی کی جانب متوجہ ہوں ، چترال میں سیاحت کے فروغ کے لیے ہر ممکن مدد کریں گے ۔

وفد نے بتایا کہ سیاحتی مقامات کی خوبصورتی سے آگاہی کے لئے سہ روزہ ورکشاپ معاون ومدد ثابت ہوجائے گی۔ اجلاس میں چترال کے سیاحتی مقامات کی پرنٹ اور الیکڑانک میڈیا کے ذریعے تشہیر پر بحث ہوئی ، صوبائی حکومت کی جانب سے چترال کے مقامات مداکلشٹ،گولین،بروغل یارخون،کالاش ویلی ، کریم آباد، گبور اورلاسپور ٹورازم سپارٹ قرار د ئے جانے کے بعد سیاحت کو فروغ ملا لیکن ابھی بہت سے ایسے جنت نظیر مقامات ہیں جو حکومت اور سیاحوں کے نظروں سے اوجھل ہیں جن کو دنیا کے سامنے لانے کے لئے اقدامات کرنے کی ضرورت ہے۔

حاجی غلام علی نے کہاکہ چترال کی ٹورازم سے کمراٹ دیر بھی ترقی کرے گااور سیاح یورپ اور مغربی دنیابھول جائیں گے۔ انہوں نے کہاکہ حکومت توجہ دے رہی ہے لیکن اس پر کام مذید تیز کرنے کی ضرورت ہے ، وفاقی اور صوبائی حکومت ٹورازم کے لئے مراعات کا اعلان بھی کریں تاکہ سرمایہ کار بھی یہاں سیاحت کے فروغ میں دلچسپی لیں ۔