خیبرپختونخوا حکومت نے گزشتہ تین سالوں میں 14 ارب روپے کا ریکارڈ ٹیکس وصول کیا

پشاور (اُردو پوائنٹ اخبارتازہ ترین - آن لائن۔ 29 جون2022ء) خیبرپختونخوا حکومت نے گزشتہ تین سالوں میں سیلز ٹیکس اور دوسرے ذرائع سے 14 ارب روپے کا ریکارڈ ٹیکس وصول کیا ہے۔ کے پی آر اے نے ٹیکس فائلنگ کمپلائنس میں 51% سے 75% تک اضافہ کیا ہے،1900 سے 19000 ٹیکس رجسٹریشن میں اضافہ ہوا ہے جب کہ پچھلے تین سالوں میں ٹیکس ریٹرن 18% سے بڑھ کر 22% ہو گیا ہے۔ اگلے پانچ سالوں میں 50 ارب روپے کا ہدف ہے۔

اس بات کا انکشاف محکمہ خزانہ اور کے پی ار اے کے افسران نے بدھ کے روز پشاورکے مقامی ہوٹل میں منعقدہ دو روزہ پینل ڈسکشن ورکشاپ کے پہلے دن کیا۔ پینل ڈسکشن ورکشاپ کا مقصد ورلڈ بینک اور ملٹی ڈونرز ٹرسٹ فنڈ (MDTF) کے تحت گورننس اور پالیسی پروجیکٹ، KPRMP اور SPEED کے تحت گورننس اصلاحات کے اقدامات میں اب تک کی کامیابیوں کو اجاگر کرنا اور مستقبل میں مزید اقدامات اٹھانے کے لئے مشورہ کرنا ہے۔

(جاری ہے)

افتتاحی کلمات میں بشارت احمد ایڈیشنل سیکرٹری خزانہ، حکومت خیبر پختونخوا نے کہا کہ خیبرپختونخوا حکومت کا گورننس ریفارمز پر آج کا پینل ڈسکشن صوبے کے مستقبل اور بین الاقوامی پارٹنرز کے لیے بہت اہمیت رکھتا ہے۔ انہوں نے صوبے میں موثر کارپوریٹ گورننس، فنانشل مینجمنٹ، ریونیو موبلائزیشن، پبلک انویسٹمنٹ مینجمنٹ اور سٹیزن سینٹرک گورننس میں ملٹی ڈونرز ٹرسٹ فنڈز، ورلڈ بنک کے تعاون کا شکریہ ادا کیا۔

انہوں نے کہا کہ تمام اسٹیک ہولڈرز کی انفرادی اور اجتماعی کوششوں سے کئی شعبوں کے اندر گورنس میں کافی بہتری آئی ہے۔خیبرپختونخوا کی صوبائی حکومت کو ٹیکس ریونیو میں خاطر خواہ اضافے پر مبارکباد دیتے ہوئے ناجی بن حسین کنٹری ڈائریکٹر ورلڈ بینک پاکستان نے کہا کہ ورلڈ بینک پاکستان کو مجموعی طور پر 500 ملین ڈالرز تین شعبوں یعنی ریونیو کلیکشن، ریونیو اور اخراجات اور ترقیاتی اورمالیاتی انتظام پر خرچ کر رہا ہے۔

انہوں نے کہا کہ ریونیو جنریشن میں مزید اضافے کا امکانات موجود ہے۔ملک اور صوبے کو بہتر سہولیات فراہم کرنے میں بہتری لانے کے لئے ریونیو جنریشن بہت اہم ہے۔گورننس سیکٹر ورلڈ بنک کے ٹاسک ٹیم لیڈر مسٹر ریمنڈ محولا نے کہا کہ ورلڈ بنک صوبے میں ای گورننس کے قیام کے لیے صوبائی حکومت کی مدد کر رہا ہے تاکہ حکومت میں منظوری کے عمل کو موثر بنایا جا سکے۔

انہوں نے مزید کہا کہ فائل سسٹم کو ڈیجیٹائز کیا جائے گا. پینلسٹ فضل امین شاہ ٹیکس ایڈوائزر خیبر پختون خواہ ریونیو اتھارٹی نے کہا کہ گورننس ایڈ پالیسی پراجیکٹ کے تعاون سے صوبے کو 2019-22 میں سروسز پر سیلز ٹیکس 44% سے بڑھا کر 84% کرنے میں مدد ملی، نئے ٹیکس دہندگان کی رجسٹریشن میں 50% سے % 75 تک کا اضافہ ہوا ہے۔ٹیکس دہندگان کی مدد سے صوبے میں تعلیم اور شاہراہوں سمیت دیگر شعبوں کے منصوبے مکمل ہوں گے ۔

آفتاب احمد، ڈائریکٹر بی او آر نے کہا کہ عام لوگوں کی سہولت کے لیے گورننس اینڈ پالیسی پروجیکٹ اور کے پی آر ایم پی کے تعاون سے لینڈ ریکارڈ کی ڈیجیٹلائزیشن اور ای سٹیمپنگ کی سروس شروع کرنے کے لئے اقدامات اٹھائے گئے ہیں۔ اراضی کے ریکارڈ کو ڈیجیٹائز کرنے سے سرکاری اراضی کے ساتھ ساتھ عوام کی املاک پر ناجائز قبضہ ختم ہونے میں مدد ملے گی۔ شاہد حسین ڈپٹی ڈائریکٹر خیبر پختون خواہ پروکیورمنٹ اتھارٹی نے اس موقع پر اظہار خیال کرتے ہوئے کہا کہ گورننس اینڈ پالیسی پراجیکٹ کی مدد سے پبلک سروس ڈیلیوری کے مختلف شعبوں بشمول پبلک سیکٹر پروکیورمنٹس میں مجموعی طور پر اصلاحات کی مہم کو آگے بڑھایا ہے۔