وزیراعظم کے میثاقِ معیشت کے پیغام کا خیر مقدم کرتے ہیں : یو بی جی

اس وقت ملک مشکل ترین معاشی بحران سے گزر رہا ہے، سیاست دانوں کو اپنے اختلافات بھلا کر ملک کو معاشی بحران سے نکالنے کے لیے مل جل کر جدوجہد کرنے کی ضرورت ہی:سرپرست اعلیٰ ایس ایم منیر

بدھ 17 اگست 2022 22:50

کراچی(اُردو پوائنٹ اخبارتازہ ترین - آن لائن۔ 17 اگست2022ء) یونائٹیڈ بزنس گروپ(یو بی جی)کے سرپرست اعلیٰ ایس ایم منیر،صدر زبیرطفیل،چیئرمین سندھ ریجن خالدتواب،مرکزی ترجمان گلزار فیروز،ایف پی سی سی آئی کے سابق سینئر نائب صدورسید مظہرعلی ناصر،ایف پی سی سی آئی الیکشن میں یو بی جی کے صدارتی امیدوار عاطف اکرام شیخ،امیدوارسینئرنائب صدر عارف جیوا اور دیگر رہنمائوں نے وزیراعظم شہباز شریف کے میثاقِ معیشت کے پیغام کا خیر مقدم کرتے ہوئے کہا ہے کہ اس وقت ملک مشکل ترین معاشی بحران سے گزر رہا ہے، سیاست دانوں کو اپنے اختلافات بھلا کر ملک کو معاشی بحران سے نکالنے کے لیے مل جل کر جدوجہد کرنے کی ضرورت ہے۔

یونائٹیڈ بزنس گروپ کے مرکزی ترجمان گلزارفیروز کے مطابقیو بی جی رہنمائوں نے مزید کہا کہ سیاست اور کاروبار پاکستان کی طاقت سے ہی زندہ رہیں گے،موجودہ حکومت جب سے برسراقتدار آئی ہے تب سے قرضوں، روپے کی قدر میں کمی اور مہنگائی کی بگڑتی ہوئی صورتحال کا سامنا کر رہی ہے۔

(جاری ہے)

انکاکہناتھا کہ تاجر برادری معیشت کو سنبھالنے کے لیے تمام سیاسی قوتوں کو مضبوط اکانومی کا پیغام دیتی ہے اور پاکستان کے استحکام کے لیے سیاستدان تمام اختلافات بھلا دیں۔

یونائیٹڈ بزنس گروپ کے رہنماؤں نے دوسروں کی محتاجی پر افسوس کا اظہارکرتے ہوئے کہا کہ ہم کب تک غیر ملکی امداد پر انحصار کرتے رہیں گے۔ یو بی جی کی قیادت نے سیاسی جماعتوں سے کہا کہ پہلے معیشت کو ٹھیک کریں، کیونکہ عام آدمی روٹی کو ترس رہا ہے، مہنگائی عروج پر ہے، غریب کا جینا مشکل سے مشکل تر ہوتا جا رہا ہے۔ اب وقت آگیا ہے کہ پاکستان کی تمام سیاسی جماعتیں تاجر برادری کی قیادت کی مشاورت سے اکٹھے ہوں اور آئندہ کا معاشی لائحہ عمل بنائیں ورنہ عام آدمی کی مشکلات کم ہونے کی بجائے بڑھیں گی جس سے پاکستان کمزور ہوگا، ہمارا بنیادی مشترکہ مقصد پاکستان کو معاشی طور پر مضبوط بنانا ہے، تب ہی ملک میں سیاست ہوگی اور کاروبار ممکن ہوسکے گا۔