یورو کی قدرامریکی ڈالر کے مقابلے میں گزشتہ 20برس کی کم ترین سطح پر آ گئی

یورو کی قدرامریکی ڈالر کے مقابلے میں  گزشتہ 20برس کی کم ترین سطح پر آ ..
برسلز (اُردو پوائنٹ اخبارتازہ ترین - اے پی پی۔ 22 ستمبر2022ء) یوکرین میں جنگ اور توانائی و خوراک کی قیمتوں میں اضافے اور افراط زر کی بڑھتی ہوئی شرح کے باعث یورو کی قدر امریکی ڈالر کے مقابلے میں گزشتہ 20برس کی کم ترین سطح پر پہنچ گئی ہے۔ جرمن نشریاتی ادارے کے مطابق جمعرات کو امریکی ڈالر کے مقابلے میں یورو کی شرح تبادلہ گھٹ کر 0.9810 ڈالر ہوگئی ہے جو کہ یورو کی تاریخ کی کم ترین سطح ہے۔

(جاری ہے)

یورو کی قدر میں یہ گراوٹ اس وقت سامنے آئی جب روسی صدر ولادیمیر پیوٹن نے یوکرین میں اپنی ریزرو فورسز کو جزوی طور پر متحرک کرنے کا حکم دیا اورفیڈرل ریزرو کی جانب سے بڑھتی ہوئی افراط زر کے ردعمل کے طور پر شرح سود میں اضافہ کرنے کا اعلان کیا گیا۔ یورپی مرکزی بینک (ای سی بی) حالانکہ افراط زر کا مقابلہ کرنے کی جنگ میں حال ہی میں شامل ہوا تھا لیکن اسے افراط زر کو روکنے کے لیے کافی جدوجہد کرنی پڑ رہی ہے۔دیگر ترقی یافتہ مغربی معیشتوں کے مرکزی بینکوں کی طرح ای سی بی بھی 2008 کے مالیاتی بحران کے بعد سے شرح سود کو مسلسل تقریباً صفر یا اس کے قریب رکھے ہوئے ہے جس کا مقصد اقتصادی ترقی کو فروغ دینا اور افراط زر کی شرح کو تقریباً 2 فیصد کی معتدل سطح تک رکھنا تھا۔

Your Thoughts and Comments